काठमाडौं । राष्ट्रिय स्वतन्त्र पार्टी (रास्पवा)का सभापति रवि लामिछानेले प्रधानमन्त्री पुष्पकमल दाहाल प्रचण्डको मुटु चेक गर्न चाहेको बताएका छन्् । बुधबार प्रतिनिधिसभाको बैठकमा बोल्दै रवि लामिछानेले यस्तो बताएका हुन् ।

बैठकमा नक्कली भुटानी शरणार्थी प्रकरणबारे प्रसंग उठाउँदै रविले प्रधानमन्त्री दाहालको मुटु काम्न थालेको महसुस भएको टिप्पणी गरेका छन् । ‘प्रधानमन्त्रीज्यु, तपाईले मुटु कमाउँदिन भन्नुभएको छ । अब म तपाईंको मुटु चेक गर्न चाहन्छु, कुन अस्पतालमा चेक गर्ने भन्नुस । काम्दैन भनेको तपाईंको मुटु काम्यो कि भन्ने मलाई शंका लागेको छ ।’, उलने भने, ‘नाम मुछिएकाहरुलाई एकपटक पनि बयानका लागि नबोलाउँदा अविश्वासको वातावरण सिर्जना भएको छ । राष्ट्रिय तथा अन्तर्राष्ट्रिय क्षेत्रमा बेइज्जत भएको यो विषयलाई सामसुम थामथुम नगर्नुहोला ।’

त्यस्तै, उनले नक्कली शरणार्थी प्रकरणको छानविनका लागि संसदीय छानविन समिति गठनको गर्नुपर्ने माग राखेका छन् । नक्कली भुटानी शरणार्थी प्रकरणमा हाल भएको छानबिन समितिले नेपाली जनताले चाहेको जस्तो परिणाम आउन नसक्ने दाबी गर्दैै उनले विशेष छानबिन समितिको माग गरेका हुन् ।

रास्वापा सभापति लामिछानेले नेपालमा निर्वाचन प्रणाली खर्चिलो भएको बताएका छन् । योसँगै आगामी आर्थिक वर्षको नीति तथा कार्यक्रममा सरकारले आर्थिक क्रियाकलापमा सबै भन्दा बढी असर गरेको नाकाबन्दी शब्द छुटाएको भन्दै आपत्ति जनाएका छन् । ‘हाम्रो आर्थिक क्रियाकलापमा बढी असर गरेको नाकाबन्दी भन्न सरकारले छुटाएछ । छुटाए छ की डराएछ म अहिले भन्न सक्दिन । नाकाबन्दी बिर्सिने विषय होइन ।’, उनले भने, ‘अर्थतन्त्र अन्योलको स्थितिमा छ । तैपनि यसलाई राजनीतिक र प्रशासनिक नेतृत्वले गम्भीरताका साथ हेरिएको देखिँदैन ।’