काठमाडौं । सहकारीको रकम तिर्न नसकेपछि बागलुङको ढोरपाटन नगरपालिकाका मेयर देवकुमार नेपाली फरार भएका छन् । इमेज बचत तथा ऋण सहकारी संस्थाका संस्थापक अध्यक्ष समेत रहेका नेपाली सहकारीका बचर्ताको रकम हिनामिना गरेर तीन दिनदेखि सम्पर्कविहीन भएका हुन् ।
सहकारीको लाखौँ रकम हिनामिना गरेपछि नेपालीमाथि रकम फिर्ताको निरन्तर दबाब परिरहेको थियो । सोही दबाबकाबीच उनी फरार भएको बाग्लुङकी प्रमुख जिल्ला अधिकारी रोशनीकुमारी श्रेष्ठले बताइन् । ‘इमेज सहकारीका बचतकर्ताहरु दिनहुँजसो निवेदन लिएर आउनुहुन्छ ।’, उनले भनिन्, ‘तर, उहाँ कहाँ हुनुहुन्छ ? केही थाहा छैन । हामी निरन्तर खोजी गर्ने प्रयासमै छौँ ।’
प्रजिअ श्रेष्ठका अनुसार नेपालीले ४ दिन अघि आर्थिक समस्या भएको कारणले आफूमाथि निरन्तर रुपमा मानसिक टर्चर आएको भन्दै इलाका प्रहरी कार्यालय बुर्तिबाङमा पत्र दिएका थिए । नेपालीले दिएको पत्रमा मानसिक तनावका कारण केही समय स्वास्थ्य उपचार गर्न बाहिर जानुपर्ने भन्दै आफ्नो सम्पत्तिको रक्षा गर्न अनुरोध गरेका थिए । तर, उनी उक्त निवेदन प्रश्चात सम्पर्कविहीन भएको प्रजिअ श्रेष्ठको भनाई छ ।
यता नगरपालिकाका उपप्रमुख धनबहादुर कठायतले पनि नेपालीले आफूलाई नगरपालिकाको कार्यवाहक जिम्मेवारी दिएर सम्पर्कविहीन भएको बताएका छन् । सम्पर्कविहीन भएपछि निरन्तर सम्पर्क गर्न खोजे पनि नेपाली सम्पर्कबाट बाहिर रहेको कठायतले बताएका छन् । नेपाली अध्यक्ष रहेको इमेज सहकारीमा बचतकर्ताको ठूलो रकम हिनामिना भएको सेयर सदस्यहरुको दाबी छ । रकम अपचलन गरेर अध्यक्ष नै फरार भएपछि अहिले बचतकर्ताहरु बिचल्लीमा परेका छन् ।
