काठमाडौं । अहिले सडकदेखि सदनसम्म एउटा विषयले निकै ठूलो स्थान पाएको छ, त्यो हो ‘भ्रष्टाचार’ । अझ पछिल्लो समय नक्कली भुटानी शरणार्थी प्रकरणमा करोडौँ ठगी गरेको अभियोगमा ‘हाइप्रोफाइल’लाई प्रहरीले भकाभक गिरफ्तार गर्न थालेपछि यसको चर्चा थप चुलिएको छ ।
संसद, सभा–सम्मेलन, भेटघाट, बैठकलगायतका ठाउँमा हरेक दिन भ्रष्टाचारको विषय उठ्छ र राजनीतिक दलका नेताहरु खुलेरै यसको विरोध गरिरहेका देखिन्छन् । यतिसम्मकी केही दिनअघि भ्रष्टाचारको विषयमा बोल्न नपाएपछि प्रतिनिधिसभाका स्वतन्त्र सांसद अमरेशकुमार सिंहले ‘अर्धनग्न’ भएर विरोध गरे । बुधबार पनि भ्रष्टाचारको विषयमा आफ्ना धारणा राख्न नपाएपछि राप्रपाका सांसदहरुले संसदमा नाराबाजी गरेको थिए ।
तर, बुधबारकै संसद बैठकमा भ्रष्टाचारको विषयमा एउटा फरक दृश्य देखियो । प्राय सबै सांसदहरुले सदनमा बोल्दा भ्रष्टाचारको खुलेरै विरोध गरे, सबैले भ्रष्टाचारीलाई हदैसम्मको कार्वाही गर्नुपर्ने माग पनि गरे । तर, नेपाली कांग्रेसका सांसद शशांक कोइरालाले भने ‘भ्रष्टाचार गर्ने तर कम गर्ने’ आशयको अभिव्यक्ति दिए ।
सदनमा भ्रष्टाचारको विषयमा आफ्ना धारणा राख्दै उनले तत्कालनीन प्रधानमन्त्री विश्वेश्वर प्रसाद कोइरालालाई स्मरण गरे । ‘विश्वेश्वरप्रसाद कोइराला प्रधानमन्त्री हुँदा उहाँको भाइले तीन सय रुपैयाँको नयाँ जुत्ता लगाउनुभएको थियो । जुत्ता किन्ने पैसा कहाँबाट आयो ? भन्ने प्रश्नको जवाफ दिन नसक्दा विश्वेश्वरप्रसाद कोइरालाले ती भाई पर्नेलाई पदबाट बरखास्त गरिदिनुभयो ।’
उनले यति भनिसक्दा सदनमा माहोल शान्त नै थियो । तर, उनले ‘भ्रष्टाचार गर्ने हो, तर कम गर्ने हो’ भन्दै रोस्टमबाटै बोले त्यसबेला सांसदहरु गलल हाँस्न थाले ।
‘करप्सन भनेको हामीले गर्छौं, अरुलाई किन दोष दिने ? हामीबाट करप्सन कम गरौँ, कम गरौँ । निर्मुन गर्न सकिँदैन ।’, उनले थपे, ‘भ्रष्टाचार भनेको एउटा रोग नै हो । प्रयास गर्यो भने निर्मुल हुन्छ । हामीले प्रयत्न गरेनौँ भने कसरी हुन्छ ।
