काठमाडौं । काठमाडौं महानगरपालिकाका मेयर बालेन्द्र शाह (बालेन)को चेतावनीपछि नेपाल विद्यालय कर्मचारी परीषद्को आन्दोलन तुहिएको छ ।
परीषद्ले आईतबार देशैभरीका सामुदायिक विद्यालय बन्द गर्ने घोषणा गरेलगत्तै मेयर शाहले विद्यालय बन्द गरे कार्वाही गर्ने चेतावनी दिएका थिए । मेयर शाहको उक्त चेतावनीपछि आइतबार काठमाडौंका अधिकांश विद्यालयहरु निर्वाद रुपमा सञ्चालन भईरहेका छन् ।
विद्यालय बन्दको घोषणापछि शनिबार मेयर शाहले सामाजिक सञ्जाल फेसबुकबाट कुनै पनि बाहनामा विद्यालय बन्द गरे कडा कार्वाही गर्ने चेतावनी दिएका थिए । शाहले महानगरपालिका भित्रका विद्यालयमा बन्द, हड्ताल र पठनपाठनमा अवरोध गर्ने कार्य भए वा शिक्षक वा कर्मचारी विद्यालयमा अनुपस्थित भएमा काठमाडौं महानगरपालिका शिक्षा ऐन दफा ४१ को (क) बमोजिम पदबाट हटाइने चेतावनी दिएका छन् । त्यस्तै, विद्यालय व्यवस्थापन समितिबाट नियमित कक्षा सञ्चालनका निम्ती पहल नभएमा सो समिति पनि विघटन गरिने शाहको चेतावनी छ ।
त्यस्तै, उनले बल प्रयोग गरि विद्यालय बन्द गरेको खण्डमा नेपाल प्रहरीसँगको समन्वयमा पक्राउ गरि फौजदारी मुद्दा चलाउने समेत चेतावनी दिएका थिए । मेयर शाहको उक्त चेतावनीपछि निर्वाध रुपमा विद्यालय सञ्चालन भइरहेको छन् भने आन्दोलनकारीको आन्दोलन तुहिएको छ ।
