काठमाडौं । नेकपा एकीकृत समाजवादीका अध्यक्ष माधवकुमार नेपालले आगामी आर्थिक वर्षका लागि सरकारले प्रस्तुत गरेको बजेट पास हुन नदिने बताएका छन् । शुक्रबार काठमाडौंमा भएको पार्टी निटक प्रेस संगठनको पहिलो केन्द्रीय बैठकमा बोल्दै अध्यक्ष नेपालले यस्तो बताएका हुन् ।

उनले सरकारले प्रस्तुत गरेको बजेटमा पक्षपात भएको बताउँदै यथास्थितिमा बजेट पास हुन नदिने बताएका हुन् । ‘सरकारले बजेटमा पक्षपात गरेको छ । भौतिक पूर्वाधारको धेरै बजेट शीर्ष नेता र अर्थमन्त्रीको जिल्लामा छुट्याइएको छ ।’, उनले भने, ‘अब कुनै पनि ठाउँमा हामी विभेद, अन्यायको विरुद्धमा लड्नेछौँ । सरकार छोड्नुपरे पनि परोस्, यो अन्याय सहनु हुँदैन ।’

त्यस्तै, नेपालले आफूहरु सत्ता पक्षकै भए पनि सरकारले विभेदपूर्ण तरिकाले ल्याएको बजेट यथास्थितिमा पास हुन नदिने बताएका छन् । ‘यही अवस्थामा, यही यथास्थितिमा बजेट पास हुँदैन ।’, उनले भने, ‘हामी प्रतिपक्षको सांसद भएर होइन, सत्ता पक्षकै भएर पनि यही यथास्थितिमा यो बजेट पास हुन दिँदैनौँ ।’