काठमडौं । सूर्यदर्शन सहकारीमा सञ्चालकको बदमासीका कारण हजारौँ बचतकर्ता बिचल्लीमा परेका छन् । पोखराको नागढुँगास्थित उक्त सहकारीमा झण्डै साढे एक अर्ब रकम हिनामाना भएपछि अहिले बचतकर्ताहरु न्याय माग्दै पोखराबाट काठमाडौं आएका छन् ।

सुर्यदर्शन सहकारीमा समस्या देखिएको करिब एक वर्ष पुग्न लाग्दा पनि आफूहरुको बचतको टुंगो नभएको पीडितहरु बताउँछन् । गत भदौदेखि नै सहकारीमा समस्या आएको भए पनि बचतकर्तालाई गुमराहमा राखेर सहकारीले मनपरी गरेको पोखरा वैदम ६ की अनुराधा श्रेष्ठले बताएकी छिन् । ‘भदौमा समस्या देखिएको सहकारीले कात्तिक, मंसिरमा पनि निक्षेप संकलन गरिरहेको थियो । पैसा फिर्ता गर्नै नसक्नगरी समस्या परेको भए किन पैसा संकलन गरेको ?’, उनले भनिन्, ‘यसमा सहकारीका सञ्चालकको बदमासी छ । खाईनखाई गरी जम्मा गरेको पैसा डुब्न लागेको छ । पैसा नभए पनि हामीलाई हाम्रो बचत सुरक्षित छ भन्ने प्रत्याभूति गराउनुपर्छ ।’

त्यस्तै, सूर्यदर्शन सहकारी पीडित समूहका संयोजक किरण श्रेष्ठले पनि आफूहरुले पैसा नै नभएर बचत सुरक्षाको प्रमाण माग गरेको बताएका छन् । ‘पैसा त अहिलेको परिस्थितिमा कसैले पनि दिन सक्दैन । हामीले बोराका बोरा पैसा चाहियो भनेका छैनौँ । केवल हामीलाई हाम्रो बचत सुरक्षित छ भन्न प्रमाण दिए पुग्छ ।’, उनले भने, ‘अहिले सबै सहकारीमा समस्या छ । सूर्यदर्शनसँगै समस्यामा परेका अरु सहकारी चलायमान हुन थालिसके तर यो सहकारीको केही पनि टुँगो भएन । हामी पोखराबाट यहासम्म आएका छौँ, बचत सुरक्षाको प्रत्याभूति नभएसम्म फर्किदैनौँ । हाम्रो बचतको जिम्म सहकारीका सञ्चालकले लिनुपर्छ ।’

सहकारी सञ्चालनको सुरुवातमा सूर्यदर्शन सहकारीले विभिन्न प्रलोभन देखाएर रकम जम्मा गर्न बाध्य बनाएको पीडितहरुको भनाई छ । ‘बालबच्चाको बर्थडे पर्यो भने केक ल्याइदिन्थे, वृद्धवृद्धालाई सम्मान गर्थे । यतिसम्म की मलाई १६ प्रतिशतसम्म त्यो पनि घण्टा-घण्टाको हिसाब गरेर दिन्छौँ भनेर झुक्याए ।’, सहकारी पीडित होमबहादुर गुरुङले भने, ‘आपतै पर्दा पनि पैसा फिर्ता दिएन । ५ लाखको चेक साट्न जाँदा एकपटक ५० हजार दियो त्यसपछि एक रुपैयाँ पनि पाएको छैन ।’

सूर्यदर्शन सहकारीको घोटाला प्रकरणबारे थप तथ्य भिडियोमा हेर्नुहोस्ः