काठमाडौं । काठमाडौंको अष्ट बचत तथा ऋण सहकारीका अध्यक्षसहित १० जनाविरुद्ध ठगी मुद्दा दायर भएको छ ।

सहकारीका बचतकर्ताको करोडौँ रकम हिनामिना गरेको आरोपमा सरकारी वकिलको कार्यालयले जिल्ला अदालत ककाठमाडौंमा उनीहरुविरुद्ध ठगी मुद्धा दायर गरेको हो ।

बचतकर्ताको करोडौँ रकम हिनामिना गर्ने सहकारीका अध्यक्ष अनिल खड्कासहित अन्य पदाधिकारी एवम् कर्मचारी फरार रहेका छन् । उनीहरुविरुद्ध प्रहरीमा दिइएको ६२ जनाको उजुरीका आधारमा ३ करोड ३२ लाख ९५ हजार ५३९ रुपैयाँ बिगो दाबी सहित मुद्दा दायर गरिएको सरकारी वकिलको कार्यालयले जनाएको छ ।

करिब एक वर्षयता बचकर्ताको रकम फिर्ता नगरी समस्यामा रहेको सहकारीका सञ्चालक र व्यवस्थापक विरुद्ध अभियोपत्र दायर भएको हो । त्यस्तै, सहकारीका सञ्चालक प्रकाश खड्का, सुवास बुढाथोकी र सहकारीकै लेखा समिति सदस्य बबिता खड्कालाई प्रहरीले पक्राउ गरी अनुसन्धान गरिरहेको प्रहरीले जनाएको छ ।

त्यस्तै, सहकारीका उपाध्यक्ष विजय खड्का, सचिव जीवन बुढाथोकी, सहकारीका कोषध्यक्ष कुम्भराज जोशी, सञ्चालकहरु सुशील बिक्रम राणा, सुशिला बोहोरा पनि फरार रहेका छन् ।

उनीहरुको खोजिकार्य भईरहेको प्रहरीले जनाएको छ । सहकारीबाट आफूहरुको करोडौँ रकम ठगिएको भन्दै बचतकर्ताहरु न्यायका लागि विभिन्न निकाय धाउने क्रम अझै पनि जारी छ ।