काठमाडौं । व्यवसायी दुर्गा प्रसाईंले आफ्ना कर्मचारीहरुलाई नियमित तलव दिएको बताएका छन् । बिहीबार झापामा अर्थ सरोकार प्रतिनिधिसँग कुराकानी गर्दै प्रसाईंले आफूले आफ्ना कर्मचारीलाई नियमित रुपमा तलव दिईरहेको बताएका हुन् ।

केही समयअघि झापाको बिर्तामोडस्थित बिएण्डसी मेडिकल कलेज, पूर्वाञ्चल क्यान्सर अस्पताल र पाँच तारे होटल एट्रियमका सञ्चालकसमेत रहेका प्रसाईंले कर्मचारीलाई तलव नदिएको विषयमा विभिन्न सञ्चार माध्यममा आएको थियो । तर, कर्मचारीलाई तलव नदिएको कुरा झुठो भएको दाबी गर्दै उनले नियमित रुपमा कर्मचारीलाई तलव दिईरहेको दाबी गरेका छन् ।

प्रसाईंले आफ्ना कर्मचारीको तलव नरोकेको बताउँदै कहिलेकाहीँ १–२ महिना ढिला हुनु सामान्य कुरा भएको बताएका छन् । ‘यति ठूलो कम्पनीमा केहीको तलव केही दिन ढिलो हुनु सामान्य हो ।’, अर्थ सरोकारसँग कुराकानी गर्दै प्रसाईंले भने, ‘१–२ महिना ढिला हुनु वा २–४ महिनाको एड्भान्स दिनु सामान्य हो ।’