">
काठमाडौं । महोत्तरीमा दिनदहाडै पेस्तोल देखाएर बैंक लुट्ने गिरोहका एकजना पक्राउ परेका छन् । महोत्तरीको महोत्तरी गाउँपालिका–२ स्थित एनएमबी बैंकको शाखामा दिउँसै पेस्तोल देखाएर बैंक लुट्ने गिरोहका २० वर्षीय अजय कुमार पक्राउ परेका हुन् ।
भारतको बिहार राज्य मधुवनी पोष्ट फुलहर टोल गोलपुर १३ हरलाखीका अजय कुमारलाई बुधबार महोत्तरीको मटिहानी नगरपालिका ८ बाट पक्राउ गरिएको जिल्ला प्रहरी कार्यालय महोत्तरीका प्रवक्ता तथा प्रहरी नायव उपरिक्षक (डिएसपी) दिलीपकुमार गिरीले जानकारी दिएका छन् ।
१६ जेठमा नम्बर नभएको दुईवटा मोटरसाइकलमा आएका ४/५ जनाको हरियारधारी समूहले पेस्तोल देखाएर १५ लाख १ हजार ४ सय ९३ रुपैयाँ लुटेका थिए । लुटपाटमा संलग्नको पहिचान भइसकेको भए पनि खोजिकार्य भने जारी रहेको प्रहरीले जनाएको छ ।
हाल पक्राउ परेका अजयमाथि मुलुकी अपराध संहिता २०७४ अन्तर्गत हातहतियार र चोरी डाकाँ शीर्षकमा मुद्दा दर्ता गरी जिल्ला अदालत महोत्तरीबाट हिरासतमा राख्ने सात दिनको म्याद लिई अनुसन्धान भइरहेको छ ।
