काठमाडौं । सरकारले हवाई टिकटमा लगाएको भ्याटविरुद्ध सर्वोच्च अदालतले अल्पकालीन अन्तरिम आदेश जारी गरेको छ । आर्थिक वर्ष २०८०/८१ को बजेटमार्फत हवाई टिकटमा मूल्य अभिवृद्धि कर (भ्याट) लगाउने सरकारको निर्णयविरुद्ध सर्वोच्चले अन्तरिम आदेश जारी गरेको हो ।

सरकारको उक्त निर्णयविरुद्ध ३ हजारभन्दा बढी ट्राभल तथा टुर अपरेटरहरुको छाता संगठन ‘नेपाल एसोसिएसन अफ टुर एण्ड ट्राभल एजेन्ट्स’ (नाट्टा)ले सर्वोच्चमा रिट दायर गरेको थियो । नाट्टाको सोही रिट उपर सुनुवाई गर्दै न्यायधीश अनिलकुमार सिन्हाले अल्पकालीन आदेश जारी गरेका हुन् । आदेशसँगै अदालतले सरकारी पक्षलाई छलफलका लागि बोलाएको छ ।

नाट्टाले सर्वोच्चमा दायर गरेको रिटमा हवाई टिकटमा भ्याट लगाउने निर्णय व्यवसायमैत्री नभएको, आन्तरिक राजस्व विभागद्धारा जारी सूचना अस्पष्ट भएको, अध्ययन नगरी हवाई टिकटमा भ्याट लगाउने निर्णय गरिएको र यसले पर्यटन व्यवसायलाई निरुत्साहित गर्ने भन्दै व्यवसायीहरुले रिट दायर गरेका थिए ।