- अर्थ सरोकार सुदूरपश्चिम ब्यूरो
कैलाली । कैलालीमा ट्राफिक प्रहरीले लागुपदार्थ सेवन गरी सवारी साधन चलाउनेमाथि कडाई गरेको छ । लागुपदार्थ सेवन गरी सवारी चलाउँदा सवारा दुर्घटना बढ्न थालेपछि कैलालीमा लागुपदार्थ सेवन (लापसे) चेकजाँच गर्न सुरु गरिएको हो ।
यसरी लापसे चेकजाँचका क्रममा कैलालीबाट डडेल्धुराको गन्यापधुरा गाउँपालिका वडा नम्बर १ का ३३ वर्षीय भिमराज अवस्थीलाई नियन्त्रणमा लिइइएको छ । कैलालीको गोदावरी नगरपालिका ५ गेटास्थित मोहना–अत्तरिया ६ लेन सडकमा लागु पदार्थ सेवन गरी सवारी चलाईरहेको भन्नै सूचनाका आधारमा चेकजाँच गर्दा अवस्थीलाई नियन्त्रणमा लिइएको जिल्ला प्रहरी कार्यालय कैलालीका प्रमुख तथा प्रहरी निरीक्षक विरेन्द्र जोहारीले जानकारी दिएका छन् ।
लागु औषध परीक्षण किटको प्रयोग गरी ३० वटा निजी सवारी साधन चेकजाँच गर्दा अवस्थीले लागुपदार्थ सेवन गरी टिप्पर चलाएको पाइएको थियो । अवस्थीसँगै उनले चलाएको प्र.०३ ०१–००३ क ४७१२ नम्बरको टिप्पर पनि नियन्त्रणमा लिइएको छ ।
त्यस्तै, सवारी दुर्घटना न्यूनिकरणका लागि मापसेसँगै अब कैलालीमा लापसे जाँचलाई पनि प्रभावकारी बनाउँदै लगिएको जिल्ला ट्राफिक प्रहरी कार्यालय कैलालीका प्रमुख जोहारीले बताएका छन् ।
