बैंकका फाइनान्स अफिसर प्रेम श्रेष्ठले बैंकले सार्वजनिक गरेको तथ्यांक गलत भएको स्वीकारेका छन् । ‘हो, डिपिएस गलत छापिएछ, करेक्सन हुन्छ ।’ श्रेष्ठले भने- ‘भोलिको पत्रिकामा करेक्सन गर्छौं ।’ उनले भोलि भुलसुधार गर्ने भने पनि यसबाट सेयरधनीहरु भ्रममा परिसकेका छन् भने यहि रिपोर्ट हेरेर लगानीकर्ताहरुले सेयर किनिरहेका छन् । यस विषयमा प्रश्न गर्दा श्रेष्ठले भने -‘अँ ! गलत नै भएको रहेछ, अव भोलि करेक्सन भईहाल्छ ।’

यस विषयमा बैंकको गुनासो इकाईमा फोन गर्दा गुनासो इकाईका प्रमुख हिरा लामा आजै बिदा बसेको पाइएको छ । उनको फोन नम्बर अहिले भोला नेपालले उठाईरहेका छन् । नेपालले यस विषयमा आफुलाई थाहा नहुने र फाइनान्स तथा लेखा विभाग प्रमुख बासु अधिकारीलाई फोन गर्न भन्दै उनको नम्बर दिए । तर चौतर्फी गुनासो आएपछि अधिकारी आज फोन नै अफ गरेर बसेका छन् ।

बैंकले गत आर्थिक वर्षको चौथो त्रैमाससम्मको अपरिष्कृत वित्तीय विवरण प्रकाशित गर्दा गरेको यस्तो गल्ती गल्ती मात्र नभई चलखेलको माध्यम हुन सक्ने शंका लगानीकर्ताहरुले गरेका छन् । राम्रो विवरण देखाएर सेयर भाउमा चलखेल गरी बेच्ने र भोलिपल्ट सुधार गरेर सेयरको भाउ घटाएर आफन्तकानाममा  किन्ने काममा बैंककै कर्मचारीहरु लागेको चर्चा भईरहेका बेला यो घटनाले सो शंकालाई थप पुष्टी नजिक लगेको लगानीकर्ताको आरोप छ । यद्यपी बैंकका उच्च अधिकारीहरुले भने बैंकका कर्मचारीहरु यस्तो घटनामा संलग्न भएको पाइएमा कारवाही हुने बताउँछन्।