महिनावारीका समयमा हुने दुखाईको बर्णन शब्दमा हुनै सक्दैन सायद । अझ कतिपय महिला दिदिबहिनीहरुको स्वास्थ्यमा भएको गडबडका कारण यो दुखाईको दर्द अझ बेहिसाब छ । अझ बैंक तथा वित्तीय संस्था र इन्स्योरेन्स कम्पनीमा हुने कामको प्रेसरले महिनावारीको सो समयलाई झनै पीडादायी बनाईरहेको छ। महिलाहरुले राजश्वलाका समयमा भोग्ने यो दुखदायी पीडालाई धेरैले सामान्य स्वास्थअवस्था भनेर नजरअन्दाज गरिरहे । परिणाम, कर्पोरेट भनिएका संस्थाहरुमा पनि महिला बिरामी हुने यो समयमा कामबाट बिश्राम लेउ र आराम गर भनेर कसैले भनेन ।
धन्न ! शिखर इन्स्योरेन्सले महिला कर्मचारीहरुको यो पीडा बुझिदियो, र त आजको गर्वका साथ भन्नुपर्ने भएको छ -‘शिखर इन्स्योरेन्सले महिलाहरुलाई महिनावारीका समयमा विदा उपलब्ध गराउन थालेको छ, र यो स्वागत योग्य छ ।’
हो, निर्जीवन बीमा कम्पनी शिखर इन्स्याेरेन्स कम्पनी लिमिटेडले आफ्नो कम्पनीमा कार्यरत महिला कर्मचारीहरुलाई महिनावारीका समयमा विदाको सुविधा गत असारबाट सुरु गरेको छ । निर्जीवन बीमा कम्पनीहरुमध्ये दोश्रो ठुलो रोजगारदाता कम्पनी शिखर इन्स्योरेन्समा कुल कर्मचारीमध्ये ४० प्रतिशत महिला छन् । महिनावारीका समयमा महिला कर्मचारीलाई हुने शारीरिक र मानसिक पीडाकाे समयमा आराम मिलोस् भनेर कम्पनीले यस्तो सुविधा ल्याएको बताएको छ । कम्पनीका अनुसार महिनामा एक पटक महिला कर्मचारीले महिनावारीका समयमा बिदा बस्न पाउँछन् । कम्पनीका अनुसार यस्तो सुविधा कर्मचारीले आकस्मिक रुपमासमेत लिन पाउनेछन् ।
महिनावारीका समयमा काममा फोकस पनि गर्न नसक्ने अवस्था हुने, सोहि कारण कार्य सम्पादनमा पनि असर पर्ने, र महिनावारीका समयमा आराम पनि चाहिने हुनाले कम्पनीले यस्तो सुविधा ल्याएको कम्पनीको भनाई छ। शिखर इन्स्योरेन्सबाट अरु कम्पनीहरु पनि सिकुन्, इन्स्योरेन्स कम्पनीहरुमात्र होइन बैंक, वित्तीय संस्था, लगायतका सबै कम्पनीहरुले सिकुन् ।
