काठमाडौं । शिवशिखर बहुउद्धेश्यीय सहकारी संस्थाका बचतकर्ताले आफ्नो बचत रकम बराबरको सामान र जग्गा लिने सहमति गरेका छन् । सहकारीको पोखरा शाखाका बचतकर्ताले सहकारीको डिपार्टमेन्टल स्टोरबाट सामान उठाउने र जग्गा लिनेसम्मको सहमति गरेका हुन् ।
सहकारीमा डुबेको आफ्नो रकम उठ्ने सम्भावना साह्रै न्यून देखेपछि यस्तो सहमति गरिएको बचतकर्ताले बताएका छन् । ‘यो सहकारीको पोखरामा दुई ठाउँमा कार्यालय छ । दुईवटा डिपार्टमेन्टर स्टोरसमेत छन् ।’, सहकारीका एक बचतकर्ताले भने, ‘फसेको रकम उठाउन लाखौँ कोसिस गर्दा पनि रकम उठ्ने सम्भावना कम देखेपछि डिपार्टमेन्टर स्टोरबाट सामान उठाउने र जग्गा लिने सहमति गरेका हौँ ।’
यसो त पोखराका बचतकर्ताहरु शिव शिखरको ठगीको विषय लिएर महानगरपालिका, सहकारी विभाग, प्रहरी र सीईआबीसम्मै पुगेका छन् । तर, सहकारीमा फसेको रकम नउठ्ने भएपछि बचतकर्ताहरुले बचत रकमअनुसार सामान र जग्गा लिने सहमति गरेका छन् ।
सहकारीको अर्बौं रकम हिनामिना गरेको र अन्य अनुत्पादित क्षेत्रमा अनावश्यक लगानी गरेको पाइएपछि हाल प्रहरीले सहकारीका सञ्चालक केदारनाथ शर्मासहित पुष्कर मल्ल, अमिशराज भण्डारी र गीता शर्मालाई पक्राउ गरेको छ । त्यस्तै, सहकारीका अन्य सञ्चालकहरु सुशीन बानियाँ, भोजराज पौडेल, तेजबहादुर तामाङ, दीपकबहादुर वयर, राजु साखकर्मी, लिलानाथ गौतम र रमेश न्यौपाने भने फरार छन् ।
सहकारीको पोखरा शाखामा मात्रै १ हजार बचतकर्ताहरुले ५४ करोड २३ लाख ८५ हजार बिगो र ८ वर्ष जेल सजायको माग दाबीसहित मुद्धा दर्ताको तयारी गरेका छन् ।
