">
काठमाडौं । आखिर पैसाको मोह कसलाई हुँदैन र ? आफूसँग सानदार घर होस्, गाडी होस्, टन्न पैसा होस् र सबै विलासिता सेवाको उपभाग गर्न सकियोस् भन्ने चाहना नहुने मान्छे यो संसारमा सायदै भेटिएलान् । कतिपय मान्छेहरु राम्रै नाम र दाम हुँदाहुँदै पनि पैसाकै लागि ‘साईड विजनेश’ वा अन्य पेशामा लागिरहेका हुन्छन् । जसको ज्वलन्त उदाहरण हुन् अन्तराष्ट्रिय क्रिकेटर मेहराब होसैन जुनियर ।
होसैन बंगलादेशको राष्ट्रिय क्रिकेट टोलीका पूर्वअलराउन्डर हुन् । सन् २००६ मा बंगलादेशको राष्ट्रिय टोलिमा ‘डेब्यु’ गरेका होसैनले बंगलादेशका लागि टेस्ट, एकदिवसीय र टि–२० अन्तराष्ट्रिय गरी तीन वटै खेल खेलिसकेका छन् । होसैनलाई अधिकांश क्रिकेट प्रेमीहरुले ‘लेफ्ट ह्याण्ड’ (बाँया हाते) ब्याट्सम्यानका रुपमा पनि चिन्ने गर्छन् । हाल उनै चर्चित क्रिकेटर होसैन क्यानाडा प्रहरीमा जागिर खान्छन् ।
होसैन शुक्रबार मात्रै क्यानडाको रोयर क्यानेडियन मोन्टेड पुलिस (आरसीएमपी)मा आवद्ध भएका छन् । ३६ वर्षीय होसैनलाई क्यानडाको नियाग्रा क्षेत्रीय प्रहरी मुख्यालयमा प्रहरी अधिकृतको ब्याच प्रदान गरिएको छ । उनले क्यानडामा कन्स्टेबल पदबाट जागिर सुरु गरेको अन्तराष्ट्रिय सञ्चार माध्यमहरुले जनाएका छन् ।
मेहराब होसैन जुनियर बंगलादेशका लागि खेलेको सात टेस्ट खेलमा दुई सय ४३ रन बनाएका थिए । ब्याटिङमा मात्र होइन, होसैन उत्कृष्ट बलर पनि हुन् । उनले टेस्ट क्रिकेटमा चार विकेट पनि लिएका थिए । त्यस्तै, एकदिवसीय क्रिकेटमा पनि सर्वाधिक ५४ रन बनाएका होसैनले त्यहाँ पनि ४ विकेट लिएका थिए ।
अन्तराष्ट्रिय क्रिकेट प्रतियोगिताबाट टाढिएपछि होसैनले केही समय घरेलु क्रिकेट भने खेलेका थिए । तर, सक्रिय खेलजीवनबाट टाढिएपछि हाल होसैन क्यानडा प्रहरीमा कार्यरत रहेका छन् ।
