काठमाडौँ । अहिले काठमाडौँ महानगरका मेयर बालेन्द्र शाह (बालेन)ले सिंहदरबारमा आगो लगाईदिन्छु भनेर लेखेको स्ट्याटस चर्चामा छ । एक साता अघि जन्मिएका दुई सन्तानमध्ये एकको निधन भएको अवस्था र अर्की छोरी आईसीयुमा उपचाररत रहेको अवस्थामा बालेनले बिरामी श्रीमती बोकेको गाडी रोकेको भन्दै आक्रोश पोखेका हुन्। अहिले यो प्रसङ्ग चर्चामा रहेका बेला यस्तै घटना राष्ट्र बैंकमा पनि भएको छ । प्राइम कर्मर्सियल बैंकले आफुलाई ठगेको भन्दै एक ऋणीले आफ्नो समस्या समाधान नभए प्राइम बैंक र राष्ट्र बैंकमा आगो लगाईदिन्छु भनेपछि हंगामा मच्चिएको खुलासा भएको छ ।
साबिकको कैलाश बिकास बैंकले आफ्नो पैसा खाईदिएको, पछि केहि पैसा फिर्ता दिएको तर सो पैसा पुन: ब्याजका नाममा तानिदिएको, आफुलाई काम गर्न नदिएर आफ्नो ऋणको रकम बैंकले दुरुपयोग गरेको र आफुलाई काम गर्न नदिएको भन्दै उनी केहि बर्षयता कैलाश बिकास बैंकसँग लडाईमा थिए । अहिले कैलाश बिकास बैंक प्राइम कमर्सियल बैंक भएको छ ।
ऋणी रेशम राज पन्थीका अनुसार उनको पैसा बैंकले दुरुपयोग गरेको छ । ‘मेरो पैसा बैंकले दुरुपयोग गरेको त छ नै, पछि केहि पैसा फिर्ता त दियो तर फेरी त्यहि पैसा ब्याज भनेर तानिदियो । मलाई काम गर्न दिएको छैन, बरु उल्टै मलाई सडकमा पुर्याउने खेल भएको छ ।’ अर्थ सरोकारसँग कुराकानी गर्दै पन्थीले भने-‘हदै भएपछि के गर्नु ? म विद्रोही बनेको छु ।’
उनले राष्ट्र बैंकमा भएको राष्ट्र बैंकका प्रतिनिधि, प्राइम बैंकका प्रतिनिधि र आफुबीचको बैठकमा आफुले प्राइम बैंक र राष्ट्र बैंकमा आगो लगाईदिन्छु भनेको पुष्टी गरे । ‘म ठगिएको छु । मैले मलाई ठग्ने प्राइम कमर्सियल बैंकविरुद्ध कारवाही गरेर मलाई न्याय नदिए म राष्ट्र बैंक र प्राइम कमर्सियल बैंकमा आगो लगाईदिन्छु भनेको हो ।’ अर्थ सरोकारसँग कुराकानी गर्दै पन्थीले भने- ‘मर्ता क्या नहिं कर्ता भनेझैं भएको छ । बैंकको बदमासी कति सहने ?’बैठकमा पन्थीले राष्ट्र बैंकका प्रतिनिधि र बैंकरहरुलाई ‘डाका’ भनेकोसमेत पन्थीले स्वीकारे । ‘हो, मैले उनीहरुलाई डाका भनेको हो । मेरो पैसा खाईदिएका छन्, मलाई सडकमा पुर्याउन लागे, अनि के भन्नु त ?’
यता राष्ट्र बैंकले भने ऋणी पन्थीलाई एक पत्र पठाउँदै आगामी दिनमा बैठकमा दुर्व्यवहार नगर्न भनेको छ । २०७९-१२-०८ मा बसेको बैठकमा पन्थीले अत्यन्तै अमर्यादित भाषा प्रयोग गरी अशोभनीय र आपत्तिजनक व्यवहार गरेकाले सो विषयमा राष्ट्र बैंकको गम्भीर ध्यानाकर्षण भएको र त्यसमा खेद प्रकट गर्दै आगामी दिनमा त्यस्तो व्यवहार नदोहोर्याउन पत्राचार गर्ने निर्णय भएकोले सोहि अनुसार गरिएको भन्दै पन्थीलाई राष्ट्र बैंकले पत्राचार गरेको छ ।
पन्थी तिनै ऋणी हुन्, यसले यसअघि राष्ट्र बैंकमा प्राइम कर्मसियल बैंकका सीइओलाई ‘मेरो सबै खायौ, अव यो कोट पनि बेचेर खाउ’ भन्दै कोट फुकालेर दिएका थिए । तत्कालीन कैलाश बिकास बैंकका मेनेजरले आफ्नो पैसा दुरुपयोग गरेको आरोप पन्थीको छ । बैंकले आफ्नो पैसा खाईदिएको भन्दै पन्थीकी श्रीमतीले मेनेजरको नाक फुटाईदिएपछि बैंकले उनको दुरुपयोग भएको रकममध्ये ५० लाख दिएको थियो । पछि सो पैसा पनि ब्याजको रुपमा बैंकलाई नै तिरिसकिएको पन्थीको भनाई छ । मेनेजरको नाक फुटाईदिएका पन्थीकी श्रीमतीविरुद्ध बैंक प्रहरीकहाँ जाँदा प्रहरीले केस दर्ता गरिदिएको थिएन ।
