काठमाडौं । भानुमती साना किसान कृषि सहकारी संस्थाका प्रबन्धकलाई प्रहरीले पक्राउ गरेको छ । तनहुँको भिमाद नगरपालिका ९ सखेपस्थित भानुमती साना किसान कृषि सहकारी संस्थाका प्रबन्धकलाई प्रहरीले पक्राउ गरेको हो । 

सहकारीको रकम हिनामिना गरेको भन्ने उजुरीका आधारमा सहकारीका प्रबन्धक ५२ वर्षीय चुत्रबहादुर थापालाई पक्राउ गरिएको जिल्ला प्रहरी कार्यालय तनहुँका प्रहरी नायब उपरीक्षक (डीएसपी) मोहनबहादुर खाँणले पुष्टि गरेका छन् । डीएसपी खाँणका अनुसार उनले विभिन्न मितिमा संस्थाको सेयर रकम तथा बचत रकम हिनामिना गरेको देखिएको छ । ‘संस्थाको रकम हिनामिना गरेको अभियोगमा थापालाई पक्राउ गरेका छौँ ।’, अर्थ सरोकारसँग कुराकानी गर्दै डीएसपी खाँणले भने, ‘थापा अहिले प्रहरी हिरासतमै छन् । थप अनुसन्धान गर्दैछौँ ।’ 

यसो त संस्थाका प्रबन्धक थापाले एक सय ३० सेयर सदस्यहरुको नाममा काल्पनिक ऋण लगानी देखाएर रकम हिनामिना गरेको समेत पाइएको छ । यसरी थापाले विभिन्न समयमा गरी संस्थाको दुई करोड ६९ लाख ७१ हजार ९ सय ६६ रुपैयाँ हिनामिना गरेको देखिएको प्रहरीले जनाएको छ । 

हाल पक्राउ परेका थापामाथि तनहुँ जिल्ला अदालतबाट सात दिनको म्याद थप गरी अनुसन्धान गरिरहेको प्रहरी उपरीक्षक मोहनबहादुर खाँणले बताएका छन् ।