काठमाडौँ । सरकारले समस्याग्रस्त पशुपति सेभिङ्ग एण्ड को–अपरेटिभमा फसेको बचतकर्ताको रकम फिर्ता गराउन पहल सुरु गरेको छ । एक सूचना जारी गर्दै सहकारी व्यवस्थापन समितिको कार्यालयले पशुपति सहकारीमा फसेको रकम फिर्ता गराउन पहल सुरु गरेको जनाएको हो । 

कार्यालयले सोही सूचना मार्फत सहकारीका रकम फसेका बचतकर्तालाई आफ्नो बचत रकम माग दाबी गर्न पनि आग्रह गरेको छ । 

बचतकर्ताहरुले सूचना जारी भएको ३५ दिनभित्र माग दाबीको आवेदन दिन सक्नेछन् । बचतकर्ताहरुले पशुपति सहकारीमा फसेको रकम फिर्ताको लागि अनलाइनमार्फत आवेदन दिन सक्नेछन् । आवेदन दिन चाहनेले सहकारी व्यवस्थापन समितिको कार्यालयको वेबसाइटमार्फत अनलाइन आवेदन दिनुपर्नेछ । 

बचतकर्ताको करिब ५३ करोड रुपैयाँ हिनामिना गरेको भन्दै सहकारीविरुद्ध परेको उजुरी र सहकारी विभागको सिफारिसका आधारमा भूमि व्यवस्था, सहकारी तथा गरिबी निवारण मन्त्रालयले पशुपति सहकारीलाई साउन १ गते समस्याग्रस्त घोषणा गरेको थियो ।