काठमाडौँ । हरितालिका तीजको अघिल्लो दिन आज आइतबार दर खाएर दर खाने दिन मनाइँदै छ । तर दर खाएर रमाइलो गर्ने दिन ‘दारु’ अर्थात रक्सीको माग पनि ह्वात्तै बढेको पाइएको छ । तीजको समयमा रक्सी, बियरजस्ता मदिराजन्य पदार्थको माग ह्वात्तै बढेको हो ।
कोटेश्वरका विभिन्न ७ रक्सी पसलमा गरिएको सोधनीका क्रममा व्यापारीहरुले तीजमा रक्सीको व्यापार ह्वात्तै बढेको स्वीकारे । ‘तीजमा रक्सीको व्यापार अघिल्लो वर्ष पनि बढ्थ्यो । यसपालि अघिल्लो वर्षको जस्तो व्यापार त छैन, तर अरु समयभन्दा तीजको अवसरमा मदिराको व्यापार बढेको भने हो ।’ कोटेश्वरका एक व्यापारीले अर्थ सरोकारसँग भने, ‘हार्ड ड्रिंक्स भन्दा पनि बियर र वाइनको माग बढेको छ ।
कोटेश्वरकै अर्का व्यापारीले पनि मदिराको व्यापार बढेको स्वीकारेका छन् । ‘दर खाएको भोलिपल्ट ब्रत बस्ने हुनाले आइतबार व्यवसाय अलि कम छ । शनिबार त अचाक्ली व्यापार भएको थियो ।’ ती व्यापारीले अर्थ सरोकारसँग भने- ‘बियर बढी गएको छ । त्यसपछि वाइनको माग बढेको छ ।’
यता तीजको नाममा अनावश्यक तडकभडक गर्ने प्रचलन बढ्दै गर्दा रक्सीको माग बढेको व्यापारीहरुको तर्क छ ।
