काठमाडौँ । नेपाल स्टक एक्सचेन्ज (नेप्से) ले धौलागिरी लघुवित्त वित्तीय संस्थाको कारोबार रोक्का गरेको छ । लघुवित्तका सीईओ र अध्यक्षले लाभांश घोषणाको सूचना लुकाएको भन्दै नेप्सेले कारोबार रोक्का गरेको हो । कारोबार रोक्का गर्दै नेप्सेले लघुवित्तलाई सूचना लुकाएको विषयमा स्पष्टीकरणसमेत सोधेको छ ।
नेप्सेका अनुसार लघुवित्तको सञ्चालक समितिको बैठकले सेयरधनीलाई १५ प्रतिशत लाभांश दिने घोषणा कात्तिक २२ गते नै गरेको थियो । तर, कम्पनीले लाभांश घोषणाको सूचना २३ गते बजार बन्द भएपछि नेप्सेलाई पठाएको थियो ।
दोस्रो बजारमा प्रभाव पार्ने सूचना ढिलो गरी बुझाएको भन्दै धितोपत्र सूचीकरण विनियमावली २०७५ को विनियम २२ (१) मा भएको व्यवस्था बमोजिम कारोबार रोक्का गर्दै स्पष्टीकरण सोधिएको नेप्सेले जनाएको छ ।
लघुवित्तलाई नेप्सेले शुक्रबार पठाएको पत्रअनुसार पत्र पठाएको तीन कार्यदिनभित्र कम्पनीले स्पष्टीकरण नेप्सेमा पेश गर्नुपर्नेछ ।
