काठमाडौँ । सर्वोच्च अदालतले हिमालयन रि इन्स्योरेन्सको प्रिमियम मूल्यमाथि कारण देखाउ आदेश जारी गरेको छ । अदालतले हिमालयन रिको आईपीओ रोक्न परेको रिटउपर सुनुवाइ गर्दै कारण देखाउ आदेश जारी गरेको हो ।
हिमालयन रिलाई प्रिमियम मूल्यमा आईपीओ जारी गर्न दिएको विषयमा नेपाल धितोपत्र बोर्डसँग सर्वोच्चले कारण मागेको छ । न्यायाधीश डा. कुमार चुडालको इजलासले सरोकारवाला निकायहरुलाई कारण देखाउ आदेश जारी गर्दै अन्तरिम आदेशको छलफलका लागि दुवै पक्षलाई मंसिर १९ गते छलफलका लागि बोलाएको छ ।
प्रिमियम मूल्यमा आईपीओ जारी गर्न दिएर आफुसहितका लगानीकर्तालाई नोक्सान भएको भन्दै यामप्रसाद भट्टराई र अभिवक्ता भीमसेन रायमाझीले सर्वोच्चमा निवेदन दर्ता गराएका थिए ।
सर्वोच्चमा दायर भएको उक्त रिटमा हिमालयन रिलाई प्रिमियम मूल्यमा आईपीओ जारी गर्न दिनु कानुनविपरीत भएको र उक्त कार्यमा नियामकको समेत मिलेमतो रहेको आरोप छ ।
कम्पनीले प्रतिकित्ता १०० रुपैयाँ अंकित मूल्यमा १०६ रुपैयाँ प्रिमियम जोडेर २०६ रुपैयाँका दरले आईपीओ जारी गरेको छ । कम्पनीले हाल जारी गरेको आईपीओमा वैदेशिक रोजगारीमा रहेको नेपालीहरुले मात्रै आवेदन दिन पाउनेछन् ।
