काठमाडौँ । नाडेप लघुवित्त वित्तीय संस्थाको नाफामा भारी गिरावट आएको छ । लघुवित्तले सार्वजनिक गरेको चालु आर्थिक वर्षको पहिलो त्रैमाससम्मको अपरिस्कृत वित्तीय विवरणअनुसार लघुवित्तको नाफा ९५.८४ प्रतिशतले घटेको हो । यसअवधिमा लघुवित्तले ५ लाख १० हजार रुपैयाँ मात्रै खुद नाफा कमाएको छ । जब कि गत आर्थिक वर्षको सोही अवधिमा लघुवित्तले १ करोड २२ लाख ४६ हजार रुपैयाँ खुद नाफा कमाएको थियो ।
यसअवधिमा लघुवित्तको निष्क्रिय कर्जा ४.९७ प्रतिशतबाट बढेर ६.५६ प्रतिशत पुगेको छ । यही कारण पनि लघुवित्तको नाफामा भारी गिरावट देखिएको हो ।
लघुवित्तले सार्वजनिक गरेको वित्तीय विवरणअनुसार असोज मसान्तसम्ममा लघुवित्तको खुद ब्याज आम्दानी २७.२८ प्रतिशतले घटेको छ भने खुद फि आम्दानी १६.५७ प्रतिशतले बढेको छ । त्यस्तै यसअवधिमा लघुवित्तको अन्य सञ्चालन आम्दानी ४.९७ प्रतिशत र सञ्चालन मुनाफा ९९.३२ प्रतिशतले घटेको छ ।
नाफासँगै चालु आर्थिक वर्षको पहिलो त्रैमासमा लघुवित्तको प्रतिसेयर आम्दानी (ईपीएस) पनि घटेको छ । यसअवधिमा लघुवित्तको ईपीएस १० रुपैयाँ ८ पैसाबाट घटेर ४२ पैसामा सीमित भएको छ । यसअवधिमा लघुवित्तको प्रतिसेयर नेटवर्थ १८३ रुपैयाँ ५५ पैसा रहेको छ ।
चुक्ता पूँजी ४८ करोड ५७ लाख रुपैयाँ रहेको लघुवित्तको जगेडा कोषमा ४० करोड ५८ लाख रुपैयाँ सञ्चित रहेको छ ।
