काठमाडौँ । मित्रमिलन बचत तथा ऋण सहकारी संस्थाको रकम हिनामिना प्रकरणमा पर्वतको कुश्मा नगरपालिकाका प्रमुख प्रशासकीय अधिकृत उदयबहादुर पराजुली पक्राउ परेका छन् । उनलाई जिल्ला प्रहरी कार्यालय पर्वतको टोलीले बुधबार कार्यकक्षबाटै पक्राउ गरेको हो ।

पराजुलीलाई पक्राउ गर्न जिल्ला प्रहरी कार्यालय कास्कीले गरेको अनुरोधका आधारमा उनलाई पक्राउ गरिएको पर्वत प्रहरी कार्यालयका प्रहरी निरीक्षक अर्जुन पौडेलले बताएका छन् ।

हाल पक्राउ परेका पराजुलीलाई जिल्ला प्रहरी कार्यालय कास्की पठाउने तयारी गरिएको प्रहरीले जनाएको छ ।

प्रहरीका अनुसार सहकारी ठगीमा पक्राउ परेका संस्थाका अध्यक्ष रमण पौडेल र व्यवस्थापक किरण अधिकारीले सहकारीको कार्यक्षेत्र विस्तार गर्दा पराजुलीलाई घुस खुवाएको बयान दिएका थिए । पराजुली त्यसबेला सहकारी रजिष्ट्रारको कार्यालय गण्डकी प्रदेशका प्रमुख थिए । त्यसबेला घुसबापत १ करोड १५ लाख रुपैयाँ बुझाएको भन्ने बयानका आधारमा उनलाई पक्राउ गरिएको प्रहरीले जनाएको छ ।

मित्रमिलन सहकारीमा २६ करोड रुपैयाँ बढी रकम अपचलन भएको भन्दै बचतकर्ताले उजुरी दिएपछि अध्यक्ष पौडेल र व्यवस्थापक अधिकारी पक्राउ परेका थिए ।