काठमाडौँ । समस्याग्रस्त सहकारीलाई चैत मसान्तभित्र बचत फिर्ताको कार्ययोजना पेश गर्न निर्देशन दिइएको छ । समस्याग्रस्त सहकारी व्यवस्थापन समितिमार्फत समस्याग्रस्त सहकारीहरुलाई आगामी चैत मसान्तभित्र बचत फिर्ता गर्नेगरि कार्ययोजना पेश गर्न निर्देश दिइएको हो ।
उच्चस्तरीय सहकारी क्षेत्र सुधार सुझाव कार्यदल, २०७९ को प्रतिवेदनका आधारमा बचतकर्ताको बचत फिर्ता गर्न नसकेर समस्याग्रस्त सहकारीलाई बचत फिर्ताको कार्ययोजना पेश गर्न निर्देशन दिइएको हो ।
त्यस्तै, सहकारी समस्यामा समाधानका लागि कार्यदलको प्रतिवेदन क्रमशः कार्यान्वयन हुने क्रममा रहेको पनि बताइएको छ । सरकारले पछिल्लो समय समस्याग्रस्त सहकारी व्यवस्थापन कार्य तीव्ररूपमा अघि बढाएको छ ।
अर्काे व्यवस्था नभएसम्म नगरपालिकालाई कार्यक्षेत्र बनाई बचत तथा ऋणको कारोबार गर्न सङ्घ, प्रदेश र स्थानीय तहबाट कुनै पनि प्रकृतिको सहकारी दर्ता, कार्यक्षेत्र विस्तार र सेवा केन्द्रको स्वीकृतमा रोक लगाइएको छ । केही सहकारीलाई समस्यायग्रस्त घोषणा गरी संस्थाको सम्पत्ति व्यवस्थापन र दायित्व भुक्तनी गर्न समस्याग्रस्त सहकारी व्यवस्थापन समितिमार्फत कारबाही अघि बढाइएकोे छ ।
