">
काठमाडौँ । बचतकर्ताको करोडौँ रकम ठगेर बुडाबुडी नै फरार भएपछि आरक्ष बचत तथा ऋण सहकारीका बचतकर्ताको बिचल्ली भएको छ । सहकारीका अध्यक्ष शारदा आचार्य न्यौपाने र प्रमुख कार्यकारी कमल न्यौपाने फरार भएका हुन् । सहकारीको रकम ठगी गरेर फरार भएको डेढ वर्षसम्म पनि दुवैजना सम्पर्कमा नआएपछि बचतकर्ताहरुले अझैसम्म पनि रकम फिर्ता पाउन सकेका छैनन् ।
संस्थाकी अध्यक्ष शारदा आचार्य न्यौपाने र प्रमुख कार्यकारी कमल न्यौपाने श्रीमान श्रीमती हुन् । हालसम्म उनीहरु दुवैजना सम्पर्कमा आएका छैनन् ।
हाल आरक्ष सहकारी समस्याग्रस्त घोषणा भएको छ । आफूहरुको करोडौँ बचत हिनामिना भएको भन्दै सहकारीका पीडितहरुले आरक्ष सहकारी र संस्थाका अध्यक्ष तथा सिइओविरुद्ध काठमाडौँ महानगरपालिकामा उजुरीसमेत दिएका थिए । महानगर हुँदै सहकारी विभागसम्म पुगेको उक्त सहकारी ठगीको विषयमा हाल प्रहरीले पनि छानविन गरिरहेको छ । यद्यपि सहकारीको रकम ठगेर फरार भएका श्रीमान श्रीमती अझै पनि सम्पर्कमा आएका छैनन् ।
सहकारीका अध्यक्ष र सिइओ फरार भएपछि अन्य सञ्चालकले बचत फिर्ता गर्न नसक्ने भन्दै २०७९ भदौ ९ गते सहकारीको कार्यालयमा सूचना नै टाँसेका थिए । त्यसदेखि यता संस्थाका अध्यक्ष र सिइओ फरार छन् । अहिले पनि उनीहरुको खोजिकार्य भइरहेको प्रहरीले जनाएको छ । हाल सहकारीको सबै कार्यालयहरु बन्द छन् ।
काठमाडौँको सितापाइला, चावहिल र माछापोखरी गरी तीन ठाउँमार्फत कारोबार गर्दै आएको उक्त सहकारीमा बचतकर्ताको ४ करोड रुपैयाँ हिनामिना भएको पाइएको छ ।
