काठमाडौँ । १४ किलो सुन तस्करी प्रकरणमा पक्राउ परेका मीनबहादुर घलेको समूहले १३८ किलो सुन तस्करी गरेको खुलासा भएको छ । त्रिभुवन विमानस्थल भन्सार कार्यालयको छानबिन समितिले गरेको अनुसन्धानबाट घले र उनको समूहले विभिन्न समयमा गरी १३८ किलो सुन तस्करी गरेको पाइएको हो ।

मंसिर २२ गते फ्लाइ दुबईको विमानमार्फत तस्करीको १४ किलो सुनसहित नेपाल आएका गोरखाका चन्द्र घले पक्राउ परेपछि प्रहरीले मीनबहादुर घलेलाई पनि पक्राउ गरेको थियो ।

मीनबहादुर घलेले दुबईमा रहेका अंकित अग्रवाल नाम गरेका व्यक्तिसँग सम्पर्क गरी नेपालमा सुन तस्करीको व्यवस्था मिलाएको छानबिन समितिले निष्कर्ष निकालेको छ ।

समितिले गरेको छानबिनले मीनबहादुर घले, चन्द्र आले र कृष्णकुमार श्रेष्ठले त्रिभुवन विमानस्थलमा गरिएको सेटिङका आधारमा पटकपटक गरी १३८ किलो सुन तस्करी गरिसकेको पुष्टि गरेको हो ।

दुबईमार्फत आएको तस्करीको सुन विमानस्थलबाट बाहिर निकाल्न नागरिक उड्डयन प्राधिकरणका एसी मेकानिक राधाकृष्ण श्रेष्ठ, कार्यालय सहयोगी लेकबहादुर तामाङ, करारका पूर्व कर्मचारी रमेश देउला, एसी शाखाका कार्यालय सहयोगी अनिल श्रेष्ठ र प्लम्बर शेरबहादुर बस्नेतले सघाएको समेत समितिले निष्कर्ष निकालेको छ ।