काठमाडौँ । कपिलवस्तुमा भन्सार कार्यालयका कर्मचारीले मदिरा चोरेको पाइएको छ । कपिलवस्तुको कृष्णनगर भन्सार कार्यालयका कर्मचारीले जाँचपासका लागि नियन्त्रणमा लिइएका विदेशी मदिरा चोरी गरेको पाइएको हो । स्रोतका अनुसार भन्सार अधिकृत बासुदेव नेपाल, नासु सूर्य रेग्मी र रेवती गिरीको निर्देशनमा मदिरा चोरी गरिएको छानविनबाट खुलेको छ ।
उनीहरुले जाँचपासका लागि भन्दै भारतबाट फर्किएका लाहुरेहरुले ल्याएका ६० बोत्तल मदिरा नियन्त्रणमा लिएर ८ बोत्तल मदिरा गायब पारेका थिए ।
ताल्चा फोडेर मदिरा चोरी गरी सेवन गरेको घटना सतहमा आएपछि हाल उक्त घटना गुपचुपमा मिलाउने प्रयास गरिएको छ । स्रोतका अनुसार उक्त मदिरा ल्याउने लाहुरेहरुलाई फकाएर उजुरी नगर्न दबाब दिइएको छ । घटना सामसुम पार्नका लागि भन्सारका उच्च पदस्थ कर्मचारी नै लागि परेको स्रोतको दाबी छ ।
त्यस्तै, मदिरा चोरीको आरोप लागेका नासु सूर्य रेग्मी नेपालगञ्जमा हुँदा निलम्बनमा परेका थिए । पछि सेटिङका आधारमा उनी पुनः भन्सार कार्यालयमै पुगेको पाइएको छ ।
