काठमाडौँ । लमजुङको कालिका बचत तथा ऋण सहकारी संस्थाका पूर्वअध्यक्ष मृगेन्द्र घिमिरेलाई सम्पत्ति शुद्धीकरणले पक्राउ गरेको छ । सहकारी ठगी प्रकरणमा पक्राउ परेर ३० लाख धरौटी तिरेर रिहा भएका घिमिरेलाई छुट्नेबित्तिकै पक्राउ गरिएको हो । पक्राउ परेका घिमिरेलाई सम्पत्ति शुद्धीकरण विभाग, काठमाडौँ पठाइसकेको प्रहरीले जनाएको छ ।
जिल्ला अदालतमा दर्ता भएको सहकारी ठगीसम्बन्धी मुद्दामा घिमिरेलाई कालिका सहकारी ठगी प्रकरणको मुख्य दोषी बनाइएको छ । कालिका सहकारी ठगी प्रकरणमा हाल २६ जना फरार छन् ।
प्रहरीका अनुसार सहकारीमा बचतकर्ताको रकम हिनामिना गरेको, गैरकानुनी रुपमा रकम अपचलन गरेको, मनपरी ऋण प्रवाह गरेको लगायतका आरोपमा बचतकर्ताले दिएको उजुरीका आधारमा ३३ जना विरुद्ध पक्राउ पुर्जी जारी भएको थियो ।
तर, हालसम्म ८ जना मात्रै पक्राउ परेका छन् । उनीहरु पनि धरौटीमा छुटिसकेको प्रहरीले जनाएको छ । हाल फरार रहेकाहरुको खोजीकार्य भइरहेको प्रहरीले जनाएको छ ।
