काठमाडौँ । सक्कली बोत्तलमा नक्कली रक्सी भरेर बिक्री गरेको आरोपमा नौ जना पक्राउ परेका छन् । नक्कली रक्सी बनाएर कारोबार गरेको भन्ने सूचना आधारमा मंगलबार काठमाडौँ उपत्यका अपराध अनुसन्धान कार्यालयले ९ जनालाई पक्राउ गरेको हो ।
पक्राउ पर्नेमा रामेछापका २८ वर्षीय मनोज खत्री, २६ वर्षीय विनोदकुमार कार्की, सिन्धुपाल्चोकका २७ वर्षीय मोहन खड्का र सिन्धुपाल्चोककै २८ वर्षीय गौरव तामाङ रहेका छन् ।
त्यस्तै, प्रहरीले काठमाडौँ कागेश्वरी मनोहराका ३५ वर्षीय सुमन नगरकोटी, सिन्धुलीका ४० वर्षीय लेखविक्रम थापा, रामेछापका २३ वर्षीय महेश खत्री, सिन्धुपाल्चोकका १८ वर्षीय रोशन कार्की र रामेछापका २० वर्षीय मनिष खत्रीलाई पनि पक्राउ गरेको छ ।
पक्राउ परेकाहरुले डबल ब्यल्याक, ब्याल्याक लेबल, खुकुरी रम तथा गोल्डेन ओक लगायतका ब्राण्डका बोत्तलमा नक्कली रक्सी भरेर बिक्री वितरण गर्ने गरेको प्रहरीले जनाएको छ ।
प्रहरीका अनुसार काठमाडौँको मनोहरा नगरपालिका-५ थलीस्थित भरत थापाको घरमा डेरा गरी बस्ने विनोदकुमार कार्कीको कोटाबाट नक्कली रक्सी बनाउने सामाग्रीहरु पनि बरामद गरेको छ । हाल उनीहरुमाथि थप अनुसन्धान भइरहेको प्रहरीले जनाएको छ ।
यसरी ब्राण्डेड रक्सीका सक्कली बोत्तलमा नक्कली रक्सी भरेर ती रक्सीहरु काठमाडौँ लगायतका विभिन्न शहरहरुमा रहेका पार्टी प्यालेस तथा रेष्टुरेण्टहरुमा पठाउने गरेको पनि पाइएको छ ।
