काठमाडौँ । सरकारले शिवशिखर बहुउद्धेश्यीय सहकारी संस्थाका बचतकर्तालाई आफूले पाउनुपर्ने रकम मागदाबी गर्न आग्रह गरेको छ । बुधबार सार्वजनिक सूचना जारी गर्दै भूमि व्यवस्था, सहकारी तथा गरिबी निवारण मन्त्रालयल अन्तर्गतको समस्याग्रस्त सहकारी व्यवस्थापन समितिको कार्यालयले शिवशिखर सहकारीका बचतकर्तालाई मागदाबी आवेदन पेश गर्न आग्रह गरेको हो ।
समितिका अनुसार शिवशिखर सहकारीबाट रकम लिन बाँकी रहेको बचतकर्ता तथा साहूहरुले सूचना जारी भएको ३५ दिनभित्र आफ्नो रकम मागदाबी गर्न सक्नेछन् ।
रकम मागदाबी गर्नका लागि सम्बन्धित व्यक्तिले समस्याग्रस्त सहकारी व्यवस्थापन समितिको वेवसाइट www.coopmc.gov.np मा गएर आफूले लिन बाँकी रहेको रकमको सप्रमाण मागदाबी आवेदन पेश गर्नुपर्नेछ ।
सरकारले शिव शिखर सहकारीलाई भदौ ५ गते नै सहकारी ऐन, २०७४ को दफा १०४ अनुसार समस्याग्रस्त घोषणा गरिसकेको छ । हाल सहकारीका अध्यक्ष केदारनाथ शर्मासहित चार जना सञ्चालकलाई पुर्पक्षका लागि कारागार चलान गरिसकिएको छ ।
