काठमाडौं । नेपाली कांग्रेसका नेता एवं सांसद दीपक गिरीले देशभरका सहकारी पीडितहरुलाई न्याय दिलाउन माग गरेका छन् । शुक्रबार प्रतिनिधि सभा बैठकको विशेष समयमा बोल्दै उनले सहकारी पीडितहरुलाई न्याय दिलाउने जिम्मा सरकारको भएको भन्दै ध्यानाकर्षण गराएका हुन् ।
‘अहिले नेपालमा ३१ हजार भन्दा बढी सहकारीहरुमा झण्डै १४ लाख सदस्यले खाइ नखाई बचत गरेको रकम डुबेको गुनासो गरिरहेका छन् । सहकारी पीडितहरुलाई न्याय दिलाउने जिम्मा पनि सरकारको हो । उनीहरुको बचत फिर्ता गराईयोस् ।’ उनले भने ।
त्यस्तै, उनले ग्यालेक्सी टीभीका अध्यक्ष रहेको जीबी राई समूहले पोखराका १८ हजार बढी बचतकर्ताको १ अर्ब ३५ करोड रकम हिनामिना गरेको बताए । त्यसैगरी, पोखराको सूर्यदर्शन बचत तथा ऋण सहकारी संस्थाबाट गैरकानुनी रूपमा ऋण लिई अपचलन गरेको समेत उनले बताए ।
सहकारीको पैसा हिनामिना गर्नेहरुलाई कडा कारवाही गर्न र पीडितहरुलाई उनीहरुको पैसा फिर्ता गराउन उनले माग गरे। उनले भने ‘जीबी राइ समूहले करिब ४९ हजार सर्वसाधारणको सात अर्ब रुपैयाँभन्दा बढी हिनामिना गरेको प्रहरीको अनुमान छ । आम जनताको अरबौं रकम कहिले र कसरी फिर्ता हुने हो ? दोषीहरुले कहिले सजाय पाउने हुन् ? सरकारले जवाफ दिनु पर्यो । सहकारीको पैसा हिनामिना गर्नेहरुलाई कडा कारवाही गर्न र पीडितहरुलाई उनीहरुको पैसा फिर्ता गराउन माग गर्दछु ।’
साथै, उनले पीडितहरु न्याय माग्न पैदल हिडेर काठमाडौँ आउनु पर्छ भने गाउँ गाउँमा सिंहदरबार भनेको के हो ? भन्ने प्रश्न गरेका छन् । ‘अहिले कैयौं साता पैदलै हिडेर मिटरब्याज पीडितहरु काठमाडौँ आउनु भएको छ । हामी संघीय प्रणालीमा गएका छौं , तर आम जनताले आफ्नो समस्या लिएर भोकै, प्यासै यो जाडोमा किन काठमाडौँ नै आउनु पर्ने ? गाउँ गाउँमा सिंहदरबार भनेको के हो ? ’ सांसद गिरीले भने ।
