">
काठमाडौँ । सिटिजन्स बैंकका सीइओ गणेश राज पोखरेलले नेताको भन्दा चर्को भाषण गरेका छन् । बैंकको १७औँ बार्षिकोत्सव अवसरमा उनले कुनै कन्सर्टमा गायकले गीत गाएको, र नेताले चुनावमा भोट मागेजसरी चर्को भाषण गरेका हुन् । चर्को भाषण गर्दा पनि कर्मचारीले ताली नबजाएपछि उनले पटकपटक ताली बजाउन निर्देशनसमेत दिएका छन् ।
प्राप्तिमार्फत आएका संस्थाका कर्मचारीहरुलाई विभेद गरेको आरोप लागिरहेका बेला उनले बैंकमा हाम्रालाई भन्दा पनि राम्रालाई छानिने दाबी गरेका छन् । प्रमोसनमा गुनासो आएको स्मरण गर्दै उनले बैंकमा कसैलाई भेदभाव नगर्ने प्रतिबद्धता व्यक्त गरेका छन् ।
नेताकै शैलीमा अरु बैंकलाई कमजोर र आफ्नो बैंक राम्रो भनेका उनले अरु बैंकमा काम गर्ने वातावरण नभएको भन्ने गुनासो आउने गरेको, अरु बैंकको वितरणयोग्य नाफा नकारात्मक रहेको जस्ता कुराहरु झिकेर अरु बैंकको विरोधसमेत गरेका थिए । सेयरधनीलाई पटक पटक निराश बनाएको बैंकका सीइओले यसपटक कम्तीमा १० प्रतिशत रिटर्न दिने प्रतिबद्धता व्यक्त गरेका छन् । यसका लागि काम गर्न उनले कर्मचारीहरुलाई निर्देशन दिएका छन् । उनले १० प्रतिशत रिटर्न दिन्छु भनेर प्रतिबद्धता व्यक्त गर्दा कर्मचारीले मुख अँध्यारो बनाएपछि उनले पुन: ताली बजाउन निर्देशन दिएका थिए ।
आफैँ आइक्यानको अनुशासनको कार्वाही भोगेर पनि बैंकका सीइओ बनेको भए पनि सीइओ पोखरेलले सुशासनको चर्को भाषण गरे । मर्जरलाई मृत्युको संज्ञाको आशय प्रकट गर्दै उनले ३२ वटा बैंक २० वटा बैंकमा झर्दा बाँचेको बैंक भएकाले सिटिजन्स सुशासनको मामलामा अलिकति पनि सम्झौता नगर्ने बताएका छन् । सुशासनको कुरा गरिसकेपछि पनि उनले आफ्नो संचालक समितिलाई ताली बजाएर अभिनन्दन गरिदिन निर्देशन दिएका थिए ।बैंकले राखेको पोष्ट अध्यक्षले सेयर गरेकोमा निकै खुसी व्यक्त गरेका पोखरेलले अध्यक्षसँग आफ्नो दिनमा ५ पटक कुरा हुने र अध्यक्षलाई आफ्नो बैंकको निकै चिन्ता रहेकोसमेत बताएका छन् ।
प्रमोसनका लागि पर्फर्मेन्स दिनुपर्ने भाषण गर्दा पनि कसैले ताली नबजाएपछि उनले पुन: कर्मचारीहरुलाई ताली बजाउन निर्देशन दिएका थिए ।
अरु बेला सीइओले भनेपछि मात्र ताली बजाएका कर्मचारीहरुले सीइओले साउन १ गते बोनस डे हुने घोषणा गर्दा पनि आफैँ ताली बजाएका थिए । बोनसको कुरा आउँदा बजेको ताली सकिएपछि उनले पुन: ताली बजाउन निर्देशन दिएका थिए ।
आफ्नो मन्तव्य टुंग्याएको घोषणापछि पनि लामो बोलेका उनले जाँदाजाँदै पनि पुन: ताली बजाउन कर्मचारीहरुलाई निर्देशन दिएका थिए । सीइओको भाषणपछि पनि कर्मचारीहरु निराश देखिन्थे ।
सिटिजन्स बैंक पछिल्लो समय नक्कली सर्टिफिकेट काण्डदेखि सुनकाण्डसम्ममा विवादमा तानिएको बैंक हो । अझ केहि समय अगाडी बैंकले कर्मचारीलाई सीएसआरको पैसाबाट चकलेट बाँडेपछि त बैंक बैंकको नामजस्तै इन्टरनेशनल रुपमै विवादमा तानिएको थियो ।
बैंकका सीइओले बैंक अब्बल रहेको भने पनि सिटिजन्स बैंकले सार्वजनिक गरेको चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण हेर्दा बैंकको खुद नाफा गत आर्थिक वर्षको सोही अवधिको तुलनामा घटेको छ ।
