काठमाडौँ । सिराहामा मनि ट्रान्सफरको रकम लुटपाट भएको छ । आइतबार सिराहाको विष्णुपुरमा सञ्चालित शिव मनि ट्रान्सफरको १५ लाख ५० हजार रुपैयाँ लुटपाट भएको हो ।

मनि ट्रान्सफरको रकम लुटपाट भएको जिल्ला प्रहरी कार्यालय सिराहाका प्रवक्ता तथा प्रहरी नायब उपरीक्षक (डिएसपी) मुक्तिनाथ सापकोटाले पुष्ठि गरेका छन् । डिएसपी सापकोटाका अनुसार ग्लोबल आइएमई बैंकबाट रकम झिकेर लैजाँदै गर्दा पुरुषोत्तम यादवको साथबाट उक्त रकम लुटपाट भएको हो ।

यादवले बैंकबाट झिकेको १५ लाख ५० हजार झोलामा बोकेका थिए । जिल्ला प्रहरी कार्यालय नजिकै रहेको पेट्रोल पम्प कट्नै लाग्दा भारतीय नम्बर प्लेटको मोटरसाइकलमा आएका दुईजनाले रकम लुटेका हुन् ।

लुटपाटमा संलग्नहरुले नकाब लगाएकाले अनुहार पहिचान नभए पनि हुलियाका आधारमा खोजिकार्य भइरहेको डिएसपी सापकोटाले बताएका छन् । उनका अनुसार लुटपाटका क्रममा उनीहरुले यादवलाई पेस्तोल देखाएर लुटपाट गरेका थिए ।

यसअघि रौतहटमा पनि शिव मनि ट्रान्सफरको करिब ५१ लाख रुपैयाँ लुटपाट भएको थियो । उक्त लुटपाटमा लुटेरा समूहले गोली चलाउँदा मनि ट्रान्सफरका सञ्चालक घाइतेसमेत भएका थिए ।