काठमाडौँ । काठमाडौँ महानगरपालिकाले साई स्वागत बचत तथा ऋण सहकारी संस्थामा छापा मारेको छ । सहकारीमा करोडौँ हिनामिना भएको सूचनाका आधारमा महानगरले बुधबार गृहमन्त्री रवि लामिछानेकी पत्नी निकिता पौडेल उपाध्यक्ष रहेको उक्त सहकारीमा छापा मारेको हो ।
निकिता २०७५ सालदेखि २०७९ सालसम्म संस्थाको उपाध्यक्ष रहेकी थिइन् । त्यसबेला उक्त सहकारीमा अध्यक्ष भुवन मणी जंगम रहेका थिए ।
पौडेल उपाध्यक्ष हुँदा साई स्वागत सहकारीबाट उनको नाममा बिना धितो ५० लाख रुपैयाँ ऋण प्रवाह भएको भेटिएको अनुगमनमा संलग्न महानगरका एक अधिकारीले बताएका छन् । ती अधिकारीका अनुसार गृहमन्त्री लामिछानेसँग मित्रता रहेका संस्थाका तत्कालीन अध्यक्ष जंगमले लामिछानेलाई सहकारीको ऋण दिन सहयोग गरेको बयानसमेत दिएका छन् । यद्यपि पौडेलको नाममा रहेको उक्त कारोबार फर्छ्यौट भइसकेको छ ।
हाल जंगम र पौडेल दुवै सहकारीको पदाधिकारी छैनन् । तर, पौडेललाई जस्तै अन्यलाई पनि बिना धितो ऋण प्रवाह गरेकै कारण सहकारी संकटमा परेको संस्थाका सञ्चालकले स्वीकारेका छन् । हाल साई स्वागत सहकारीले बचतकर्ताको ७ करोड रुपैयाँ फिर्ता गर्न बाँकी देखिएको छ ।
पछिल्लो समय सहकारी ठगी र सहकारीमा बचत हिनामिनाका उजुरी बढेपछि महानगरले महानगर क्षेत्रभित्र रहेका सहकारीमा अनुगमन सुरु गरेको छ ।
अपडेट:
यता काठमाडौँ महानगरपालिकाले भने नीतिका पौडेलको संलग्नता नदेखिएको भन्दै ‘क्लिन चिट’ दिएको छ । पौडेलका नाममा एक पत्र लेख्दै महानगरले सहकारी ठगी केसमा उनको संलग्नता नदेखिएको भन्दै लिखित जानकारी दिएको हो ।
