काठमाडौं । बचत तथा ऋण सहकारीको क्षेत्रमा रहेको समस्या समाधानका लागि सरकार कानुन संशोधन सहित फास्ट ट्रयाकमा जाने भएपछि सहकारी पीडितहरूले यसको श्रेय गृहमन्त्री रवि लामिछानेलाई दिएका छन् । अव न्याय पाउने आशा बढेको भन्दै सहकारी पीडितहरूले लामिछानेलाई धन्यवाद दिएका हुन् ।
आज केहिबेरमा लामिछानेलाई भेटेर नै उनीहरूले धन्यवाद दिने कार्यक्रम छ ।
‘रवि दाइलाई धन्यवाद छ । उहाँकै कारण नयाँ कानुन बन्ने भयो, न्याय पाउनेमा ढुक्क छौँ ।’ रविलाई बधाई तथा धन्यवाद दिन जाने तयारीमा रहेका एक सहकारी पीडीतले भने, ‘न्याय पाउने आशा सबैमा बढेको छ ।’
बिहीबार एक कार्यक्रममा लामिछानेले कानुन नै परिवर्तन गरेर भए पनि सहकारी पीडितका समस्या समाधान गर्ने बताएका थिए । दिउँसो बसेको मन्त्रिपरिषद्को बैठकले बिहीबारको बैठकले नियमित प्रक्रिया र विद्यमान कानुनबाट समस्या समाधान नहुने भन्दै नयाँ कानुनी व्यवस्थाबाट समाधान गर्ने निर्णय गरेको थियो ।
बैठकपछि सरकारकी प्रवक्ता शर्माले सहकारी क्षेत्रका समस्या समाधानका लागि कानुन नै परिवर्तन गरेर अघि बढ्ने निर्णय भएको बताएकी थिइन् ।
‘सहकारीको क्षेत्रमा रहेको समस्याबारे मन्त्रीपरिषद्को बैठकमा गम्भीरतापूर्वक छलफल भएको छ । तत्काल कानुनमा व्यवस्था गरी बचतकर्ताले बेहोर्न परेको समस्याको समाधानको प्रक्रिया सुरु गर्ने भन्ने निर्णय भएको छ,’ उनले भनिन्, ‘सामान्य नियमित प्रक्रियाबाट यो समस्या समाधान हुँदैन भनेर एकमत बनेको छ । विद्यमान कानुनबाट र संरचनाबाट पनि यो सम्भव छैन । फास्ट ट्रयाकबाट समाधान गर्नुपर्छ भनेर गम्भीर छलफल भएको छ ।’ सरकारको निर्णय सुनाउँदै शर्माले भनेकी थिइन् ।
यही कुराको जश सहकारी पीडितहरूले लामिछानेलाई दिएका हुन् ।
संघीय राजधानी काठमाडौँसहित विभिन्न जिल्लामा सहकारीका बचतकर्ता आन्दोलित छन् । आफ्नो निक्षेप सहकारी संस्था सञ्चालक र कर्मचारीहरूले अपचलन गरेपछि विचल्ली परेका बचतकर्ता मध्ये कतिपय मुद्दाको प्रक्रियामा गएका छन् भने कतिपय सरकारको मुख ताकेर बसेका छन् ।
