">
काठमाडौँ । भूमि व्यवस्था, सहकारी तथा गरिबी निवारणमन्त्री बलराम अधिकारीले एक भन्दा धेरै सहकारी संस्थामा सदस्य बन्न नपाउने गरी नीति बनाउने बताएका छन् । ६७औँ राष्ट्रिय सहकारी दिवसको अवसरमा आयोजित कार्यक्रममा बोल्दै मन्त्री अधिकारीले एउटै उद्देश्य भएका एक भन्दा बढी सहकारीमा सदस्य बन्न नपाउने गरी नीति बनाउने बताएका हुन् ।
उनले २०७७ सालमा नै एउटै व्यक्ति एउटै उद्देश्य भएका एक भन्दा बढी सहकारीमा बस्न नपाउने भनिएको भए पनि अहिले चारवटा भन्दा बढीमा रहेको भन्दै यसलाई नियन्त्रण गर्ने नीति ल्याइने बताए ।
‘२०७७ सालसम्म एउटै व्यक्ति एउटै उद्देश्य भएका सहकारीमा बस्न नपाउने भनिएको थियो । अहिले पनि तीन चारवटा सहकारीमा हुनुहुन्छ ।’, मन्त्री अधिकारीले भने, ‘यसलाई पनि नियन्त्रण र कारबाही गर्नेगरी एउटा व्यक्ति एक भन्दा धेरै सहकारीमा सदस्य हुन नपाउने गरी जानुपर्छ । यस बारेमा पनि सरकारले नीति बनाएर अगाडि बढाउँछ ।’
त्यस्तै, मन्त्री अधिकारीले गलतलाई गलत र सहीलाई सही भन्ने प्रवृत्ति सरकाले मात्रै नभइ सहकारी अभियान्ताले पनि पालना गर्नुपर्ने आवश्यकता देखिएको बताएका छन् । सहकारीभित्र देखिएका अहिलेका समस्या समाधान गर्नको लागि अहिलेसम्म भएका त्रुटीबारे खोजी गर्न जरुरी रहेको भन्दै मन्त्री अधिकारीले सहकारीसँग सरकार, सहकारी र सर्वसाधरण जोडिएकाले समस्या समाधान गर्ने सरकारको मात्रै दायित्व हो भन्ने दृष्टिकोण बनाउन नहुने बताएका छन् ।
सहकारीहरु ऐन, नियम पूरा गरेर दर्ता गर्ने तर सहकारीको उद्देश्य अनुसार काम नगर्दा सहकारीमा समस्या आएको मन्त्री अधिकारीको भनाई छ । उनले सहकारीहरुले सबैभन्दा पहिला सहकारीको उद्देश्य पूरा गर्न लाग्नुको विकल्प नभएको भन्दै राष्ट्रिय सहकारी अन्तर्गत भएका सबै निकायहरुमा कमजोरी गर्नेलाई कारबाही गर्ने बताएका छन् ।
