">
काठमाडौँ । सेयर बजारको नियामक नेपाल धितोपत्र बोर्डले रियल सेक्टरका कम्पनीलाई पूँजी बजारमा भित्र्याउन सरकारलाई सुझाव दिएको छ । बोर्डले आगामी आर्थिक वर्षको बजेटका लागि सरकारलाई पेश गरेको सुझावमा रियल सेक्टर कम्पनीलाई बजारमा भित्र्याउन सुझाव दिएको हो ।
बोर्डले बुक बिल्डिङ विधिलाई थप पारदर्शी बनाएर रियल सेक्टर कम्पनीलाई पूँजी बजारमा प्रवेश गराउनुपर्ने सुझावमा समावेश गरेको छ ।
योसँगै बोर्डले बजेटमार्फत बोर्डको आयमा लाग्दै आएको करलाई हटाउन पनि सुझाव पेश गरेको छ ।
त्यस्तै, बोर्डले धितोपत्र बोर्डको आफ्नै कार्यालय भवन निर्माणका लागि जग्गाको व्यवस्था गरिदिन पनि सरकारसँग माग गरेको छ । योसँगै बोर्डले पूँजी बजारसम्बन्धी जानकारी प्रदान गर्नका लागि पूँजी बजार प्रतिष्ठानको स्थापना गर्नुपर्ने सुझाव पनि सरकारलाई दिएको छ ।
