काठमाडौं । पोखरामा एभरेष्ट बैंक लिमिटेडको शाखा कार्यलयमा तोडफोड भएको छ । गएराती अज्ञात समुहले बैंकमा तोडफोडको प्रयास गरेका हुन्।

कास्की प्रहरीका अनुसार स्कुटरमा आएका ती व्यक्तिहरुले बैंकको सिसा फुटाएका छन् । उनले भने ‘घटनाको अनुसन्धान भईरहेको छ । राती स्कुटरमा आएर बैंकको सिसा फुटाएको प्रारम्भिक बुझाई छ।’

बैंक तोडफोडको प्रयास भएपनि लुटपाट नभएको प्रहरीले जनाएको छ ।

कहिले बैंक लुटिने, कहिले बैंकमाथि तोडफोड हुने र कहिले बैंकका सुरक्षा गार्ड मार्ने जस्ता घटना घट्न थालेपछि सरोकारवालाहरु चिन्तित बनेका छन् । बैंक तथा वित्तीय संस्थाहरुमा एक महिनाकै अवधिमा भएका यस्ता घटनाले बैंकिङको भविष्यमाथि नै प्रश्न उठाएको भन्दै सरोकारवालाहरु चिन्तित बनेका हुन् ।

केहि समय अगाडी नबिल बैंक लुटेको घटना सेलाउन नपाउँदै बिर्तामोडमा एभरेष्ट र ज्योति बिकास बैंकमा तोडफोड भएको थियो । त्यसलगत्तै पुन: नेपाल बैंकका सुरक्षा गार्ड मारिएको घटना बाहिर आएको थियो भने गयराती पोखरामा एभरेष्ट बैंकमा तोडफोडको प्रयास भएको छ ।