काठमाडौँ । ललितपुरको पुल्चोकमा रहेको निदान हस्पिटल बन्द भएको छ । विगत १४ महिनादेखिको भाडा नतिरेपछि अस्पताल रहेको घरका घरबेटीले सूचना नै टाँस गरेर अस्पतालमा ताला लगाएका हुन् ।
लामो समयदेखि घरको भाडा नतिरेको र पटकपटक भाडा तिर्नका लागि ताकेता गर्दा पनि अस्पताल सञ्चालक सम्पर्कमा नआएपछि ताला लगाउनुपरेको घरबेटीले बैशाख २० गते टाँस गरेको सूचनामा उल्लेख छ । घरबेटी मिना श्रेष्ठका अनुसार हस्पिटलले २०७९ फागुनदेखि हालसम्मको भाडा तिरेको छैन ।
हस्पिटलले मीनामा बुवा इन्द्रमान जोशीसँग २०७४ मंसिर १ गते घरबहाल सम्झौता गरेको थियो । तर, जोशीको निधनपछि हस्पिटलले प्रयोग गर्दै आएको घरजग्गा मिनाको नाममा नामसारी भइसकेको छ ।
यसो त भाडा नतिरेपछि श्रेष्ठले दुई रोपनी ११ आनामा बनेको घर र जग्गा (हस्पिटलले प्रयोग गरेको) खाली गर्न ताकेतासमेत गरेकी थिइन् । तर, घरजग्गा खाली गर्न, बक्यौता रकम, ब्याज र क्षतिपूर्ति तिर्न गरिएको ताकेताको अस्पताल सञ्चालकले बेवास्ता गरेपछि अन्ततः अस्पतालमा ताला लगाउनुपरेको अस्पतालमा घरबेटीको भनाई छ ।
हस्पिटलमा कार्यरत चिकित्सक, स्वास्थ्यकर्मी र कर्मचारीले पनि पारिश्रमिक नपाएको भन्दै यसअघि नै हस्पिटलको जागिर छोडिसकेका थिए ।
