काठमाडौँ । जेठ महिनामा घरजग्गा कारोबार बढेको छ । भूमि व्यवस्था तथा अभिलेख विभागको तथ्याङ्कअनुसार जेठमा मात्रै ६१ हजार १ सय ६१ संख्यामा घरजग्गा किनबेच भएको छ । जुन बैशाखको तुलनामा २२.८५ प्रतिशत बढी हो ।
यसो त बैशाखामा ४९ हजार ७ सय ८२ संख्यामा घरजग्गा कारोबार भएको थियो । घरजग्गा कारोबार बढेसँगै सरकारको राजश्व पनि बढेको छ ।
जेठ महिनामा सरकारले घरजग्गा कारोबारमार्फत ४ अर्ब ३३ करोड रुपैयाँ राजश्व संकलन गरेको छ । बैशाखमा भने सरकारले घरजग्गा कारोबारमार्फत ३ अर्ब ८६ करोड रुपैयाँ राजश्व संकलन गरेको थियो । जुन जेठ महिनाको तुलनामा १२.३० प्रतिशत कम हो ।
यसरी घरजग्गा कारोबारमार्फत प्राप्त हुने राजश्वमा सबैभन्दा धेरै राजश्व रजिष्ट्रेसन दस्तुर र पुँजीगत लाभकरको रहेको छ । सरकारले घरजग्गा कारोबारबाट सेवा कर, रजिष्ट्रेसन दस्तुर, पुँजीगत लाभकर लगायतका विभिन्न शीर्षकमा राजस्व संकलन गर्दै आएको छ । लामो समयदेखि सुस्त रहेको घरजग्गा कारोबार बढेपछि शिथिल अर्थतन्त्र पनि चलायमान हुने जानकारहरुले बताएका छन् ।
