काठमाडौं । भैरहवामा संचालित आयुर्वेद औषधी तथा आयुर्वेद खाद्यपदार्थ उत्पादन गर्ने कम्पनी लुम्बिनी हर्बोस्यूटिकल्सले पुँजी वृद्धि गर्दै आइपीओ जारी गर्ने भएको छ ।
कम्पनीले आइपीओ जारी गर्ने प्रक्रियाका लागि एलिट क्यापिटल लिमिटेडसँग कर्पोरेट एडभाईजरी सेवा सम्बन्धि सम्झौता गरेको छ । सम्झौतामा एलिट क्यापिटलका कार्यकारी अध्यक्ष दिनेश आचार्य र लुम्बिनी हर्बोस्यूटिकल्सका अध्यक्ष डा. धुर्ब भट्टराईले हस्ताक्षर गरेका थिए ।
एलिट क्यापिटलले ‘रोड टु आईपिओ’ योजना अन्तर्गत लुम्बिनी हर्बोस्यूटिकल्सलाई थप पुँजी जुटाउँदै पब्लिक कम्पनीमा रुपान्तरण गरी आइपीओ निष्काशन गर्न परामर्श सेवा प्रदान गर्नेछ । एलिटले कम्पनीको पुँजी वृद्धि, व्यवशाय विस्तार, वित्तिय व्यवस्थापन र बजारीकरणका लागि समेत संस्थागत परामर्श सेवा उपलब्ध गराउने भएको छ । त्यसैगरी, आइपीओ निष्काशन प्रयोजनका लागि बिक्री प्रबन्धक र अण्डरराईटरको व्यवस्थापन पनि एलिट क्यापिटलले नै गर्ने कम्पनीले जनाएको छ ।
हाल १३ करोड चुक्ता पुँजी रहेको यस कम्पनीमा नयाँ लगानीकर्ता थपिएसँगै पुँजी वृद्धि गरी नयाँ प्लान्टमार्फत उत्पादन सुरु गर्न लागिएको छ । पुँजी बृद्धिपछी कम्पनीले पव्लिक कम्पनीमा रुपान्तरण भई आईपिओ जारी गर्ने योजना बनाएको कम्पनीका अध्यक्ष डा. धुर्ब भट्टराईले जानकारी दिए ।
रुपन्देहीको तिलोत्तमा १५ मा आफ्नै भवनमा रहेको कारखानामा यस कम्पनीले विभिन्न ब्राण्डका करिब २ दर्जन आयूर्वेदजन्य औषधी तथा खाद्यपदार्थ उत्पादन गरिरहेको छ ।
