">
काठमाडौँ । पूर्वअर्थमन्त्री एवम् नेपाली कांग्रेसका प्रवक्ता प्रकाशशरण महतले बजेटमा विदेश जानेलाई बिना धितो ऋण दिने काम ठिक नभएको बताएका छन् । प्रतिनिधि सभाको बैठकमा बोल्दै महतले यस्तो बताएका हुन् ।
उनले नेपालमै रोजगारी सृजना गरेर स्वदेशमै काम गर्ने वातावरण बनाउनुपर्ने बेला उल्टै युवालाई विदेश जान प्रोत्साहन गर्ने नीति लिनु गलत भएको बताएका छन् ।
बजेटमा सरकारले गरेको विदेश जानेलाई बिना धितो ऋण दिने व्यवस्था नेपालको सरकारको नीति र सिद्धान्त विपरीत भएको महतको भनाई छ । यस्तो व्यवस्थाले युवालाई स्वदेशमै रोक्नुभन्दा विदेश जान प्रोमोट गर्ने महतले बताएका छन् ।
‘विदेश पठाउनका लागि बिना धितो ऋण दिने रे, तोकिएको एकाउन्टमा तिर्ने गरेर । तिर्छन् भन्ने कसरी ग्यारेण्टी गर्नुहुन्छ ?’, महतले भने, ‘यो व्यवस्थाले युवालाई विदेश जान झन् प्रोमोट गर्छ । यो काम ठिक भएन ।’
त्यस्तै, उनले आगामी आर्थिक वर्षका लागि सरकारले सार्वजनिक गरेको बजेटले गरेका लगानी औचित्यहीन भएको र लगानी गर्नुपर्ने ठाउँमा लगानी नभएको भन्दै बजेटप्रति असनतुष्टी व्यक्त गरेका छन् । उनले यो बजेटले हाल मुलुकमा देखिएको समस्या तथा चुनौतीको सामना गर्ने ‘रोड म्याप’ बनाउने नसकेको पछि बताएका छन् ।
