काठमाडौं। बुक बिल्डिङ बिधिबाट आइपीओ ल्याउन लागेको रिलायन्स स्पिनिङ मिल्स लिमिटेडको नाफामा भारी देखिएको छ। कम्पनीले सार्वजनिक गरेको तेश्रो त्रैमासको वित्तीय विवरण अनुसार रिलायन्सले चैतसम्म २ करोड ६३ लाख २३ हजार रुपैयाँ खुद नाफा आर्जन गरेको छ । गत आर्थिक वर्षको सोहि अवधिमा कम्पनीको खुद नाफा ९२ करोड ७८ लाख २१ हजार रुपैयाँ रहेको थियो।

गत असार महिनामा १० अर्व ५८ लाख व्यापार रहेकोमा यस अवधिसम्म आइपुग्दा कम्पनीको व्यापार ७ अर्व २१ लाख रुपैयाँ रहेको छ। कम्पनीको व्यापारमा गिरावट आउँदा नाफा प्रभावित भएको हो।

त्यसैगरी, समिक्षा अवधिमा कम्पनीको अन्य आम्दानी पनि ३ करोड ७४ लाखबाट घटेर २ करोड १४ लाखमा झरेको छ । वित्तीय खर्च २४ करोड ९० लाखबाट बढेर ३७ करोड ३३ लाख पुगेको छ ।

रिलायन्स स्पिनिङ मिल्सको प्रतिसेयर आम्दानी ५४.३४ रुपैयाँबाट घटेर २.०८ रुपैयाँ कायम भएको छ ।

कम्पनीले असार २७ गतेबाट बुक बिल्डिङ विधिबाट आइपीओ निष्कासन गर्दैछ । कम्पनीले पहिलो चरणमा वैदेशिक रोजगारीमा रहेका नेपालीहरुका लागि आइपीओ जारी गर्न लागेको हो ।

रिलायन्सले सार्वजनिक निष्कासनका लागि छुट्याइएको साधारण सेयरको १० प्रतिशत अर्थात १ लाख १५ हजार ५९६ कित्ता सेयर जारी गर्न लागेको हो । कम्पनीले प्रतिकित्ता ८२०.८० रुपैयाँको दरले आइपीओ जारी गर्न लागेको हो । लगानीकर्ताले उक्त आइपीओमा न्यूनतम ५० कित्ताका लागि आवेदन दिनु पर्नेछ ।