काठमाडौँ । कैलालीमा ट्राफिक प्रहरीको सक्रियता झनै बढेको छ । खासगरी अस्थायी प्रहरी पोष्ट फूलबारीको कमान्ड ट्राफिक प्रहरी हवल्दार सिद्धराज विष्टले सम्हालेपछि धनगढी उपमहानगरपालिकाको फूलबारी क्षेत्रमा ट्राफिक प्रहरीको सक्रियता बढेको हो ।
यसैबीच ट्राफिक नियम सिकाउने, ट्राफिक चेकिङ्ग चुस्त बनाउने कार्यमा लागी परेको अस्थायी ट्राफिक प्रहरी पोष्ट फूलबारीले नियम पालना गर्ने अटो चालकलाई सम्मानसमेत गरेको छ ।
शनिबार ट्राफिक नियम सचेतना कार्यक्रमकाबीच प्रहरी हवल्दार विष्टले अटो चालक जित बहादुर विक र गौरी चौधरीलाई खादा लगाएर सम्मान पत्र प्रदान गरेका हुन् । सम्मान पत्र प्रदान गर्दै प्रह विष्टले दुवै अटो चालकलाई ट्राफिक नियम पालना गरी कुशल तथा सक्षम चालकको परिचय दिएकोमा धन्यवादसमेत दिएका छन् ।
अटो चालक सम्मान कार्यक्रममा वडा नम्बर १९ का अध्यक्ष बाँधुराम चौधरी, इलाका प्रहरी कार्यालय बहुलियाका प्रहरी वरिष्ठ नायब निरीक्षक खेमराज पन्त र स्थानीयको उपस्थिति रहेको थियो ।
त्यस्तै, अस्थायी प्रहरी पोष्ट फूलबारीले शनिबार नै धनगढी उपमहानगरपालिका वडा नम्बर ७, १८, १९ क्षेत्रमा सवारी चलाउँदा हेलमेट प्रयोग गरौँ भन्ने बोर्डसमेत राखेको छ ।
