काठमाडौँ । पूर्वअर्थमन्त्री वर्षमान पुनले सेयर बजार बढ्नु खुसीको कुरा भएको बताएका छन् । बिहीबार अर्थ समितिको बैठकमा बोल्दै पुनले यस्तो बताएका हुन् ।
पुनले सेयर बजार २००० बिन्दुभन्दा मुनि हुँदा लगानीकर्तामा चिन्ता भए पनि अहिले बजार बढ्नु खुसीको कुरा भएको बताएका छन् ।
अहिले सेयर बजार बढ्नुको मुख्य कारण मौद्रिक नीति सहज आउनु र यसपटकको वित्त नीति र मौद्रिक नीतिबीच तालमेल मिल्नु भएको पूर्वअर्थमन्त्री पुनको भनाई छ । यद्यपि पुनले बजारमा केही कम्पनीमा देखिएको अस्वभाविक वृद्धिमा नियमन गर्न आवश्यक रहेको पनि औँल्याएका छन् ।
त्यस्तै, पुनले अहिले बजार निरन्तर उकालो गतिमा रहे पनि नेपाल धितोपत्र बोर्डको अध्यक्ष राम्रो नआएको अवस्थामा बजारको बिजोग हुने दाबी गरेका छन् । ‘नेपाल धितोपत्र बोर्डको अध्यक्ष राम्रो आए ठिक छ, राम्रो आएन भने खेलाडी निस्केर खेल्न सुरु गर्छन्, मार्केट फल हुन्छ, त्यस्तो हुँदा बजारको बिजोग हुनेवाला छ । त्यसैले सेयर बजारलाई फेयर बनाउनका लागि बोर्डको अध्यक्ष राम्रो ल्याउनुपर्छ ।’, उनले भने ।
