काठमाडौँ । नेपाली क्रिकेट टोली तालिमका लागि भारतको बैंगलोर गएको छ । क्रिकेट विश्वकप लिग-२ अन्तर्गत क्यानडामा हुने त्रिकोणात्मक सिरिजको तयारीका लागि नेपाली टोली बैंगलोरस्थित राष्ट्रिय क्रिकेट एकेडेमी (एनएसी) मा दुई हप्ता तालिमका लागि गएको हो ।

नेपाल क्रिकेट संघले सार्वजनिक सूचना जारी गरी यस्तो जनाएको हो ।

बैंगलोरमा अभ्यास खेलका लागि पनि पहल भइरहेको क्यानले जनाएको छ । भारतको प्रशिक्षणपछि श्रीलङका जाने, नेपाल आउने अथवा क्यानडामै जाने भन्ने विषयमा पनि छलफल चलिरहेको क्यानका प्रवक्ता छुम्बी लामाले बताएका छन् ।

नेपालले सेप्टेम्बरमा क्यानडा र ओमानसँग लिग टुको दोस्रो चरणमा प्रतिस्पर्धा गर्न लागेको छ । नेपाल चार खेलमा दुई अंक जोड्दै तालिकाको छैंटौ स्थानमा छ ।

लिग टु को नयाँ सर्कल नेपालबाट सुरु भएको थियो । गत फेब्रुअरीमा त्रिविमा भएको खेलमा नेपालले नामिबिया र नेदरल्यान्डसँग प्रतिस्पर्धा गरेको थियो । नेपालले नेदरल्यान्डससँगको दुई खेलमध्ये एकमा जित हात पारेको थियो ।