काठमाडौँ । राष्ट्रिय किताबखाना (शिक्षक)को वेबसाइट ह्याक भएको छ । पछिल्लो केही दिनदेखि किताबखानाको वेबसाइट ह्याक भएको हो ।
हाल ह्याक भएको वेबसाइट रिकभरीका लागि प्राविधिकहरुले काम गरिरहेको बताइएको छ ।
किताबखानाका एक कर्मचारीका अनुसार वेबसाइट ह्याक भएको दुईदिन अघि मात्रै थाहा भएको हो । त्यसअघि कहिलेदेखि वेबसाइट ह्याक भयो भन्नेबारे अझै पनि खुलेको छैन । यद्यपि उक्त विषयको प्राविधिक जाँच तथा वेबसाइट रिकभरीको काम भइरहेको ती कर्मचारीले बताएका छन् ।
राष्ट्रिय किताबखाना (शिक्षक)को वेबसाइटमा देशभरका सामुदायिक विद्यालयका करिब डेढ लाख बढी शिक्षकको विवरण रहेको बताइएको छ । राष्ट्रिय किताबखाना (शिक्षक)ले सामुदायिक विद्यालयका शिक्षकको विवरण अद्यावधिक गर्छ । वेबसाइट ह्याकरले साइटको दुरुपयोग गर्ने नियतले ह्याक गरेको भए शिक्षकका व्यक्तिगत विवरण ‘लिक’ हुनसक्ने जानकारहरुको भनाई छ ।
यद्यपि वेबसाइट ह्याक हुँदा के कति क्षति भयो ? भन्ने विषयमा थप जाँच भइरहेको बताइएको छ ।
