काठमाडौँ । नेपाल लाइफ इन्स्योरेन्सको नाफा बढेको छ । कम्पनीले सार्वजनिक गरेको गत आर्थिक वर्षको चौथो त्रैमाससम्मको अपरिस्कृत वित्तीय विवरण अनुसार कम्पनीको खुद नाफा ३०.८१ प्रतिशतले बढेको हो ।
यसअवधिमा कम्पनीले ५१ करोड ३९ लाख रुपैयाँ खुद नाफा कमाएको छ । जबकी कम्पनीले अघिल्लो आर्थिक वर्षको सोही अवधिमा ३९ करोड २९ लाख रुपैयाँ खुद नाफा कमाएको थियो ।
कम्पनीले सार्वजनिक गरेको वित्तीय विवरणअनुसार समीक्षा अवधिमा कम्पनीको खुद आर्जित बीमा शुल्क ९.८६ प्रतिशतले बढेको छ भने कुल आम्दानी पनि १२.३४ प्रतिशतले बढेको छ । त्यस्तै, यसअवधिमा कम्पनीको कुल दाबी भुक्तानी १२.६५ प्रतिशत र कुल खर्च ११.५८ प्रतिशतले बढेको छ ।
गत आर्थिक वर्षको अन्त्यसम्ममा नाफासँगै कम्पनीको प्रतिसेयर आम्दानी (ईपीएस) पनि बढेको छ । यसअवधिमा कम्पनीको ईपीएस १ रुपैयाँ ४७ पैसा बढेर ६ रुपैयाँ २६ पैसा पुगेको छ । त्यस्तै, कम्पनीको प्रतिसेयर नेटवर्थ १२९ रुपैयाँ ११ पैसा रहेको छ भने कम्पनीको मूल्य आम्दानी अनुपात ९८.९९ गुणा रहेको छ ।
