काठमाडौँ । निर्धन उत्थान लघुवित्त वित्तीय संस्था लिमिटेडको नाफा बढेको छ । लघुवित्तले सार्वजनिक गरेको गत आर्थिक वर्षको चौथो त्रैमाससम्मको अपरिस्कृत वित्तीय विवरण अनुसार कम्पनीको खुद नाफा १९७.९९ प्रतिशतले बढेको हो । कम्पनीले गत आर्थिक वर्षको चौथो त्रैमाससम्म ५० करोड ६४ लाख रुपैयाँ खुद नाफा कमाएको छ । जबकी बैंकले अघिल्लो आर्थिक वर्षको सोही अवधिको तुलनामा १६ करोड ९९ लाख रुपैयाँ खुद नाफा कमाएको थियो ।
असार मसान्तसम्ममा कम्पनीको इम्पेयरमेन्ट चार्ट घटेका कारण कम्पनीको खुद नाफा बढेको हो । यसअवधिमा कम्पनीको इम्पेयरमेन्ट चार्ज ८७ करोडबाट घटेर ४३ करोडमा झरेको छ ।
त्यस्तै, समीक्षा अवधिमा कम्पनीको खुद ब्याज आम्दानी ७.८१ प्रतिशतले घटेको छ भने खुद फि तथा कमिसन आम्दानी २१९.०२ प्रतिशतले बढेको छ । यसअवधिमा कम्पनीको खुद सञ्चालन आम्दानी ६.७७ प्रतिशत र सञ्चालन मुनाफा १८९.६२ प्रतिशतले बढेको छ ।
यसअवधिमा कम्पनीको खराब कर्जाको ग्राफ भने बढेको देखिएको छ । कम्पनीले सार्वजनिक गरेको विवरणअनुसार कम्पनीको खराब कर्जा ९.८७ प्रतिशतबाट बढेर १०.६० प्रतिशत पुगेको छ ।
नाफासँगै लघुवित्तको प्रतिसेयर आम्दानी (ईपीएस) पनि बढेको छ । यसअवधिमा कम्पनीको ईपीएस १२ रुपैयाँ ८८ पैसाले बढेर १९ रुपैयाँ ३९ पैसा पुगेको छ । यसअवधिमा कम्पनीको प्रतिसेयर नेटवर्थ १९८ रुपैयाँ ६१ पैसा रहेको छ भने मूल्य आम्दानी अनुपात ३६.७२ गुणा रहेको छ । गत आर्थिक वर्षको चौथो त्रैमासमा ३५ करोड ७५ लाख रुपैयाँ ऋणात्मक रहेको कम्पनीको वितरणयोग्य मुनाफा ३ करोड ७५ लाख रुपैयाँ धनात्मक भएको छ ।
कुल चुक्ता पूँजी २ अर्ब ६१ करोड २० लाख रुपैयाँ रहेको निर्धन उत्थान लघुवित्त वित्तीय संस्थाको जगेडा कोषमा २ अर्ब ५७ करोड रुपैयाँ सञ्चित छ ।
यता केही समयअघि लामो समयदेखि कर्मचारीको तलब नबढाएको भन्दै निर्धन उत्थानका कर्मचारीहरुले केन्द्रीय कार्यालयमा धर्ना दिएका थिए । त्यसबेला संस्थाका प्रमुख कार्यकारी अधिकृत मुकेश दाहालले संस्था नाफामा नभएकाले कर्मचारीको माग संबोधन गर्न अफ्ठ्यारो भएको बताएका थिए । तर, वित्तीय विवरणमा संस्थाको नाफा ह्वात्तै बढेको देखिएपछी सीईओसाप तनावमा परेका छन् ।
