काठमाडौँ । नेपाल पुनर्बीमा कम्पनीको नाफा घटेको छ । कम्पनीले सार्वजनिक गरेको गत आर्थिक वर्षको चौथो त्रैमाससम्मको अपरिस्कृत वित्तीय विवरणअनुसार कम्पनीको खुद नाफा १३.४९ प्रतिशतले घटेको हो । कम्पनीले असार मसान्तसम्ममा ५१ करोड ५८ लाख रुपैयाँ खुद नाफा कमाएको छ ।
जबकी कम्पनीले अघिल्लो आर्थिक वर्षको सोही अवधिमा ५९ करोड ६२ लाख रुपैयाँ खुद नाफा आर्जन गरेको थियो ।
समीक्षा अवधिमा कम्पनीको खुद आर्जित बीमा शुल्क ८.५७ प्रतिशतले बढेको छ भने कुल आम्दानी ९.३० प्रतिशतले बढेको छ । त्यस्तै, यस अवधिमा कम्पनीको खुद दाबी भुक्तानी ०.९१ प्रतिशत र कुल खर्च ८.७४ प्रतिशत बढेको छ ।
असार मसान्तसम्ममा कम्पनीको नाफासँगै प्रतिसेयर आम्दनी (ईपीएस) पनि घटेको छ । यसअवधिमा कम्पनीको ईपीएस ६३ पैसा घटेर ४ रुपैयाँ ३ पैसामा झरेको छ । हाल कम्पनीको प्रतिसेयर नेटवर्थ १४७ रुपैयाँ ४५ पैसा छ भने मूल्य आम्दनी अनुपात १९२.५५ गुणा रहेको छ । त्यस्तै, कम्पनीको जेगडा कोषमा ३ अर्ब ९२ करोड रुपैयाँ रहेको छ ।
